Azoka apirilean egitekoa zen, baina atzeratu egin behar izan dute, eta,
azkenean, sektoreak bere ekoizpenak eta lana ezagutzera emateko
erakusleihoa izango du, Iruñeko Autobus Geltoki Zaharreko nasetan.
Azoka hau funtsezkoa da sektore ekologikoa ezagutarazteko, tokiko
ekoizleei bultzada emateko eta saltoki txikiekin eta herritarrekin
loturak sendotzeko.
“Halako proiektuak garrantzitsuak dira euren kalitatezko produktuekin
herriak bizirik mantentzen laguntzen duten ekoizleak ezagutzera
emateko. Krisialdian argi geratu den moduan, nekazaritzako
elikagaien sektorea funtsezkoa da Nafarroarentzat”, azpimarratu
du Itziar Gomez Landa Garapeneko eta Ingurumeneko kontseilariak.
Autobus Geltoki Zaharreko nasetan jarriko dituzten 35 postuetan
askotariko elikagaiak egongo dira; hala nola fruta eta barazkiak, gazta,
olioa, ardoa, marmelada, ogia edo eztia; eta baita kosmetikoak ere.
Nafarroan elikagai ekologikoen kontsumoa eta ekoizpena gora egiten
ari da. Egun 700 operadore eta 84.000 hektarea daude. Topaketa hau
urteko esanguratsuena da haientzat, eta, gainera, aurtengoa ahalegin
berezi baten ondoren dator, testuinguruak baldintzatuta. Hortaz, gune
segurua izan dadin, beharrezkoak diren neurriak hartuko dituzte,
edukiera murriztuko dute eta ibilbide bat zehaztuko dute.
Azoka irailaren 18an irekiko dute, ostiralarekin, arratsaldeko 17:00etan;
larunbatean goizez eta arratsaldez egongo da zabalik; eta igandean,
eguerdira arte.