Nafarroako Gobernuak eta Nafarroako Udal eta Kontzejuen Federazioak (FNMC) bilera egin dute astearte honetan, eta migratzaileak erroldatzeko beharrezkoak diren prozesu burokratikoak izan dituzte aztergai.
Patricia Ruiz de Irízar Nafarroako Gobernuko Migratoria Politiken zuzendari nagusia Juan Carlos Castillo FNMCko presidentearekin bildu da, migratzaileen harreran eta inklusioan toki-erakundeek duten eginkizunarekin lotutako gaiak jorratzeko. Horien artean, aipagarria da pertsona horiek egin behar dituzten erroldatze-izapideen kontua, aldez aurreko baldintza administratibo eta nahitaezko gisa, kontu korronte bat irekitzea bezain egunerokoak diren ekintzak gauzatu ahal izateko.
Foru Gobernuak ohar baten bidez adierazi duenez, "COVID-19ren krisialdiaren ondorioz, babesgabetasun-egoera sortu da, eta migratzaileak geratzen dira, nahiz eta Nafarroako herrietan egon, oinarrizko gizarte-zerbitzuen laguntza jaso ezin izan dutenak, erroldatzea ez dutelako burutu".
Egoera hori testuinguru gisa hartuta, Patricia Ruiz de Irizarrek eta Juan Carlos Castillok erroldatze prozesuen inguruan lan komun etengabea egiteko deia egin dute, "eraginkortasun eta arintasun handiena, gardentasun handiena eta babes sozialeko maila nahikoak bilatzeko".
Migratzaileak gizartean sartzeari dagokionez, Politika Migratorioetako zuzendari nagusia eta FNMCko presidentea bat etorri dira tokiko administrazioak, herritarrengandik gertuen dagoenak, "zeregin nabarmena izan dezakeela eta izan behar duela" azpimarratzean. Ildo horretan, Ruiz de Irízarrek eta Castillok nabarmendu dute beharrezkoa dela udal-erakundeetan bizikidetza-planak ezartzea.
Horretarako, Nafarroako Gobernuko Migrazio Politiken Zuzendaritza Nagusitik gogorarazi dutenez, une honetan diru-laguntzen deialdi bat irekita dago kulturen arteko bizikidetza sustatzeko toki-erakundeen proiektuetarako. Zehazki, 150.000 euro izango dira tokiko erakundeek ekintzak egin ditzaten laguntzen dutenak: 90.000 euro kulturen arteko bizikidetzarako diagnostikoak eta jarduera-planak finantzatzeko erabiliko dira; gainerako 60.000 euroak, berriz, unean uneko sentsibilizazio-ekintzak diruz laguntzeko izango dira.
