Javier Remirez Nafarroako Gobernuko Presidentetza, Berdintasun, Funtzio Publiko eta Barne kontseilariak ziurtatu duenez, Gobernuak "blindatu egin du genero-indarkeriaren biktimei ematen zaien arreta salbuespenezko egoera honetan" eta zehaztu du alarma-egoera hasi zenetik 127 salaketa jarri direla indarkeria matxistagatik polizia-kidego ezberdinetan.
"Nafarroako Gobernuak, INAIren bidez, blindatu egin du salbuespenezko egoera honetan biktimei ematen zaien arreta, osasun-berme guztiekin, bai erabiltzaileentzat, bai talde profesionalentzat, Covid-19ren aurrean gomendioak betetzen direla ziurtatzeko", adierazi du.
Azaldu duenez, "hasiera-hasieratik baloratu zen emakumeei arreta integraleko taldeak, arreta-bulegoa eta harrera-baliabideak irekita, funtzionamenduan eta artatzeko moduan egongo zirela transmititzearen garrantzia", eta helburu horrekin informazio-kanpaina bat egin zen, martxoaren 16an hasi zena.
"Hasiera-hasieratik, taldeek telefono bidezko arreta bermatu zuten, baita larrialdietarako aurrez aurreko arreta ere", zehaztu du Remirezek, eta gaineratu du harrera-baliabideetan ere "estaldura onena eman zaiela uneoro genero-indarkeriaren biktimei eta haien seme-alabei".
Gainera, indarkeria egoerak areagotuko direla aurreikusten denez, gizarte osoarentzako kontzientziazio kanpainak egin direla eta "polizia-kidegoekin koordinazio estuan" lan egin dela azpimarratu du.