Idazki baten bitartez, sindikatuak eskatu die Nafarroako Berdintasunerako Institutuari, Lehendakaritza, Berdintasun, Funtzio Publiko eta Barne Sailari eta zerbitzuak kudeatzen dituen enpresari hotel edo egoitza bat egokitu dezatela, harrera baliabide horien "gehiegizko okupazioari" aurre egiteko.
Ohar baten bitartez, LABek azaldu du, gaur egun dagoen “gainokupazioa” ikusita, Nafarroako Gobernua eta enpresa kudeatzailea hainbat aukera baloratzen ari direla; besteak beste, gaitu gabe dagoen etxabe bat eta hornitu gabe dagoen pisu bat irekitzea. Izan ere, egun dauden baliabideek "plaza kopuru mugatua dute, eta gainokupatuta daude”, sindikatuaren hitzetan.
Sindikatuak salatu du koronabirusaren krisia "harrera-baliabide horien egoera ahul eta prekarioa” agerian uzten ari dela, eta, alarm egoerak dirauen bitartean, Foru Gobernuak "edozein hotel edo egoitza duin prestatzeko ahalmena" duela nabarmendu du, "isolamendu egoera gogorraz gain, tratu txar matxista pairatzen duten emakume horiek hartzeko”. "Genero indarkeria jasaten duten emakumeek leku seguru bat merezi dute, euren seme-alabekin batera babestuta sentitzeko, eta diziplina anitzeko hezkuntza taldeek baldintza duinetan artatu ahal izateko", aldarrikatu du.
LABek ohartarazi duenez, "laneko gainkarga inoiz baino handiagoa izan da osasun krisiaren ondorioz", eta horrek "zerbitzuaren kalitateari, erabiltzaileei, seme-alabei eta langileei eragiten die”. Hori dela eta, “gutxieneko kalitate baldintzetan” artatzeko hotel edo egoitza bat jartzeko eskatu du, baita txanda guztietan hezkuntzako eta garbiketako langile gehiago kontratatzeko ere, dauden beharrei aurre egiteko.