Nafarroako Parlamentuaren osoko bilkuran EH Bilduko Bakartxo Ruizek Carlos Gimeno Hezkuntza kontseilariari galdetu dio ea zer asmo duen haurrak Mendigorrian D ereduan matrikulatu nahi dituzten gurasoen eskaeraren aurrean. Gimeno Nafarroako ikastetxe publikoak ordenatzen dituen foru aginduan eta eskola mapan oinarritu da, esateko eskaera horri jaramon egingo diotela, baina betiere, “araudia beteko dutela”; alegia, euskarazko lerroa zabalduko dutela soilik foru agindu horretan ezartzen diren ratioak betez gero.
“Mendigorriaren kasuan, foru dekretuak markatzen duena da bere erreferentziazko zentroa Gares dela", esan du kontseilariak. Hortaz, berretsi du seme-alabak D ereduan matrikulatu nahi dituzten Mendigorriko familiek Garesen egin behar dutela. Hala ere, zehaztu duenez, "horrek ez du baztertzen legea eskaera sozialarekin uztartzea”, eta beraz, matrikulazio kanpainan biltzen ziren datuak aztertuko dituztela esan du.
Ruizek, berriz, erantzun dio Euskararen Legea foru agindu horren eta eskola maparen gainetik dagoela, eta legearen 2015eko aldaketek planteatzen dutela euskararen irakaskuntza pixkanaka Nafarroa osoan sustatu behar dela. Ondorioz, halako kasuetan “malgutasunez” jokatu beharra dagoela nabarmendu du, batik bat landa eremuko eskola txikien itxiera ekidin nahi badute.
Era berean, gogorarazi dio gobernuaren akordio programatikoan, besteak beste, gertuko eskolaren aldeko apustua eta landa eremuko eskolei bultzada emateko konpromisoa zehazturik daudela.
