Kargudun izan diren funtzionarioen ordainsari-osagarria indargabetu dute

Euskalerria Irratia 2019ko abe. 20a, 07:57
Nafarroako Jauregia, artxiboko irudi batean

Nafarroako Parlamentuko Osoko Bilkurak izendapen askeko konfiantzazko kargu izan diren herrialdeko administrazioko funtzionarioentzako osagarria indargabetzen duen Foru Legea onartu du. Talde guztiek bozkatu dute alde, abstrenitu egin den Navarra Suma izan ezik.

EH Bilduk bultzatutako legearen xedea da Nafarroako Gobernuko kideen eta Nafarroako Administrazioko goi kargudunen bateraezintasunei buruzko 1996ko Legearen atala indargabetzea, "agindu horretan araututako osagarri pertsonala jasotzen duten funtzionario guztiek Lege hau indarrean sartzean ez dezaten jaso".

Agindu horrek, 2007tik aurrerako ordainsari-ondorioekin, aukera ematen die Administrazioko eta haren erakunde publikoetako funtzionarioei dagokien mailako soldataren %25aren baliokidea den osagarri pertsonala jasotzeko, baldin eta, 1983tik aurrera, izendapen askeko konfiantzazko karguak bete badituzte "bi urte jarraian baino gehiagoz edo hiru urtez etenaldiarekin".

Aipatutako osagarria, "Nafarroako Administrazio Publikoen Zerbitzuko Langileen Estatutuan inolako aitorpenik ez duena", %10era murriztu zen 2012 eta 2018 artean, langileen arloko premiazko neurriei buruzko 2012ko Legea onartu ondoren.

Aurreikuspen hori urtero luzatu zen, 2018ko Legeak, 2019ko urtarrilaren 1etik aurrerako ondorioekin, gehigarria osorik berreskuratu zuen arte (%25).

Osagarri hori urtero eguneratzen zen oinarrizko ordainsari pertsonalen ehuneko berean, eta behin bakarrik aplikatzen da funtzionarioaren ibilbide profesional osoan.

Legea ez denez zuzendu, Batzordean ez da irizpenik eman, eta Nafarroako Aldizkari Ofizialean argitaratu eta hurrengo egunean jarriko da indarrean.

Taldeetako bozeramaileen txandan, horiek modu laburrean igorri dira Batzordearen eztabaidan egindako hitzaldietara, ez baita zuzenketarik edo aldaketarik aurkeztu izapide horretatik.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!