ADACEN-ek jasoko du 2019ko Nafarroako Urrezko Domina

Foru Gobernuak  ADACEN, Garuneko Kalteen Nafarroako Elkarteari 2019ko Nafarroako Urrezko Domina emateko dekretua onartu du. "Gizartea hobetzen modu erabakigarrian laguntzen duen jarduera eredugarri, solidario eta osasunaren sustatzaileagatik" adierazi du Nafarroako Gobernuak. Saria abenduaren 3an  emanen zaie, 2019ko Nafarroaren Eguna ospatzeko ekitaldien barruan.

90eko hamarkadaren hasieran, garuneko kalteak jasan zituzten pertsonen senitartekoen talde batek sortu zuen Nafarroako garuneko kalteen elkartea (ADACEN), "Arreta-baliabiderik ez zegoelako eta familiei laguntzeko sarerik ez zegoelako".Gaur egun, ADACENek 1.000 bazkide baino gehiago ditu eta 50 bat profesionalek osatutako diziplinarteko talde bat.

Erakundeak prestazio hauek koordinatzen ditu: fisioterapia, estimulazio fisikoa, logopedia, neuropsikologia, eskuzko jarduerak eta jarduera okupazionalak, laguntza soziosanitarioaz gain, betiere garuneko kalte bat duten pertsonen autonomia eta errehabilitazioa sustatzeko helburuarekin.

Era berean, herritar guztientzako sentsibilizazio-kanpainak bultzatzeagatik bereizten da, besteak beste, zahartze aktiboa, enpresan iktusa prebenitzea, osasun- eta gizarte-zerbitzuetako langileei eskerrak ematea edo txirrindularientzako kaskoaren segurtasuna eta erabilera.

Bigarren urtez jarraian, partaidetza-prozesu bat egin da, eta herritarrek saria emateko hautagaitzak aurkeztu ahal izan dituzte. Prozesu horretan, gizartea hobetzen, balio demokratikoak finkatzen eta Nafarroaren kanpo-proiekzioan laguntzeagatik nabarmendu diren pertsonak, erakundeak, entitateak eta kolektiboak aintzat hartzen dira.

ADACEN hautagaitzak 25 atxikimendu izan ditu erakunde, enpresa eta administrazio publikoen artean, hala nola NUP, Osasun Zientzien Fakultatea, CIMA, eta Nafarroako Sendagileen Elkargo Ofiziala. Aurten, besteak beste, 25 urte bete ditu hartutako burmuineko kalteak jasan dituztenekin eta haien familiekin.