Parlamentuan onarturiko mozioak Nafarroako Gobernuari eskatzen dio baimen-luzamendua ezar diezaiela joko areto eta apustu etxeei. Halaber, galdegiten dio 2006ko foru legea alda dezala, egungo egoerara egokitzeko, batez ere kirolarekin loturiko apustu etxeek izan duten hazkunde handiarengatik.
Iruñeko Urbanismo Atalak atzo eman zituen datuak. Diario de Noticias egunkariak gaur argitaratu ditu. 2010etik 22 joko areto eta apustu etxe zabaldu dituzte foru hiriburuan.
Beste hiru zabaldu nahi zituzten: bat Txantrea auzoan, Villafranca kalean. Horrek dagoeneko jasoa zuen jarduera eta obra lizentzia. Bigarren bat, Zabalgunean, Navas de Tolosa kalean. Horrek tramitazioan zuen lizentzia. Eta hirugarren bat Azpilagaña auzoan, Buenaventura Iñiguez kalean. Horrek bazuen obra eta jarduera lizentzia.
Sanduzelai, Buztintxuri, Arrotxapea, Mendebaldea eta Txantrea auzoetan auzokideek apustu etxeen aurako taldeak sortu dituzte, eta mobiizazioak antolatzen ari dira.
EH Bilduk jite honetako negozioentzako baimen luzamendua proposatu du Iruñeko Udaleko Urbanismo batzordean. Koalizio abertzalearen arabera, aretook “kezka eta arbuioa” eragiten dute auzikideen artean, eta hori dela kausa, “joko areto eta apustu etxeen baimenen gaineko erabateko luzamendua” eskatuko du gaur.
BAtzordeak aho batez onartu du Udal Aginte Taldeari eskatzea baimen-luzamendua ezar dezala, molde honetako negozioen erregulazio urbanistikoa tramitatzen den bitartean. Tramitazio hori martxan dago jada.
