Gerardo Bujanda gudari eta politikari ohia zendu da bart, Donostian. Ehun urte zituen Euskalerria Irratiko zuzendari Mikel Bujandaren aitak. Abuztuaren 25an omenaldia egin zioten Donostian.
Bujanda Donostian jaio zen, Antiguo auzoan, 1919. urtean. Oso gazte zela, 16 urterekin, boluntario joan zen gerrara, EAJko gudariekin. Saseta batailoiko azken gudaria zen. Bujanda preso hartu zuten, eta Euskal Herriko eta Espainiako kartzela askotan egon ostean, langile bataloietan behartu zuten lan egitera. Afrikara alde egin zuen eta bertan bost urte igaro zituen. 1947an Euskal Herrira itzuli zen, eta erresistentzian hasi zen lanean. Orduko EAJ klandestinitatean zegoen eta Bujanda buruzagietako bat bilakatu zen, Juan Ajuriagerra, Josu Solaun edo José María Lasarterekin batera. Bujandak esparru askotan egin zuen lan: kultur arloan, euskararen arloan, politikoan eta abar.
Irratian egindako lanarengatik da ezaguna nagusiki. 1960. urte inguruan Muñoz, Etxebeste, Mendizabal Okina, Elisabet Maiztegi, Karmen Kristobal, Koro Etxegoien eta Mikel Rezolak beste zenbaitekin batera Loiola Irratia sortu zuen Donostian, Kanpandegi kalean. 1954. urtean Frantziako gobernuak Eusko Jaurlaritzak Iparraldean antolatuta zuen Radio Euskadi ixtera behartu zuen. Hamarkada bat baino gehiago isilik izan ondoren 1965. urtean, oraingoan Venezuelatik berriro Radio Euskadiren uhinak mundura zabaldu ziren. Bujanda Radio Euskadik Euskal Herrian zuen berri emailetariko bat izan zen. 'Juan de Igueldo' goitizenarekin Hego Euskal Herriko berriak bidaltzen zituen Venezuelara irrati bidez mundura.
Espainiako trantsizioan politikagintzan jarraitu zuen, eta 1977ko eta 1979ko hauteskundeetan diputatu hautatu zuten Gipuzkoan.
Gerardo Bujanda gudaria, legebiltzarkidea eta pertsona handia hil da ehun urte zituela. Bere sendiari eta lagun guztiei gure doluminak eta besarkadarik beroena. Bere bizitza osoan konpromisoa eta elkartasuna zer den erakutsi zuen. pic.twitter.com/sCSpRrwJ7a
— Iñigo Urkullu (@iurkullu) September 5, 2019
Gerardo Bujanda, demokrata, gudaria, abertzalea...
— Juan Jose Ibarretxe (@LHKibarretxe) September 5, 2019
Itzal handiko gizona.
Agur eta Ohore pic.twitter.com/q8XyFDYez0
Agur era ohore, Gerardo! Ehun urte alderdiaren eta aberriaren alde. Mende bat Euskadiren askatasunaren alde. Alderdi osoaren izenean, gure esker ona zure bizitza oparoagatik, eta gure doluminak senideei. Ez adiorik, Gerardo. pic.twitter.com/1zu7gDMMJT
— Andoni Ortuzar (@andoniortuzar) September 5, 2019
Gerardo Bujanda gudari, alderdikide eta laguna 100 urterekin joan egin zaigu. Nire miresmen eta esker ona adierazi nahi nuke gure herriaren eta demokraziaren alde egin zuen guztiagatik. Eredu izan da euskaldun askorentzat. Goian bego. pic.twitter.com/ZHriEEolXH
— Markel Olano Arrese (@markelolano) September 5, 2019
Duela astebete bizipenak konpartitu genituen, beti bezain gustura, eta beti bezain alai. Gaur joan egin zara. Egun handira arte Gerardo! Goian bego. pic.twitter.com/w7j9ZFNsIN
— Eneko Goia (@EnekoGoia) September 5, 2019
Gerardo Bujanda gudaria hil da 100 urterekin. Mende oso bat eman du Euskal Herriaren alde. Ikuskera ezberdinak erraz bat egiten zituen gizona... Emaztea, seme-alaba, etxekoei eta familia politikoari doluminak. pic.twitter.com/oihJ2LBLAs
— Maddalen Iriarte (@MaddalenIriarte) September 5, 2019
Agur eta ohore, Gerardo Bujanda Saseta batailoiko azken gudariari. Libertadearen aldeko borrokan bidelagun izan zenari errekonozimendua zor zaio bizitza osoan erakutsitako duintasunarengatik. Senitarteko eta @eajpnv-ko kideentzat besarkada estua. https://t.co/OayjYMjuZw
— Denis Itxaso (@DenisItxaso) September 5, 2019