2019ko Nafarroako Bertsolari Txapelketa iritsi da bere azken geltokira. Tuteratik Urdazubira, Iruritatik Lizarrara, Atarrabiatik Etxarri Aranatzera eta Lesakatik Iruñera, Nafarroaren berdeak, horiak eta gorriak zeharkatu ditu 2019ko Nafarroako Bertsolari Txapelketak. Bide bat bertsoarena, euskara Nafarroan barrena barreiatzeko, mila kolore eta mila Nafarroa diren Nafarroa honetan. Gure geografia anitzean barrena ibili ostean, Iruñeko Anaitasuna kiroldegian itsasoratuko dira bide horretako urak, finalean. Martxoaren 23an jokatuko da, 17:00etan hasita.
30 bertsolarik eman zuten izena 44. Nafarroako Bertsolari Txapelketan, eta aurre-kanporaketak igarota, 24 izan ziren Tuteran hasitako ibilbidean. Final-laurdenen eta finalaurrekoen ostean, zortzi dira finalera iritsi direnak. Horiek izango dira txapelaren bila ariko direnak.
Urteak joan urteak etorri, Nafarroako euskal kulturaren erreferentzia nagusietako bat bihurtu da Nafarroako Bertsolari Txapelketa. Baina ez da bat-bateko lorea. Txapelketa urtean zehar egiten den lan isilaren fruitu da, bertsolaritza transmititzeko alorrean egindako lan eskergaren ondorio zuzena. Arlo horretan, funtsezkoa da “Bertsolaritza Irakaskuntzan” programa, Nafarroako Bertsozale Elkarteak Nafarroako Gobernuaren eta udal zein mankomunitateen laguntzarekin antolatzen duena, eta hezkuntza arautuko herrialde osoko 2.500 ikaslerengana iristen dena. Bertso Eskolen bitartez, bertsogintzan sakontzeko aukera izaten dute gazte eta helduek, herri eta auzo mailako guneetan. Aisialdiaren esparruak, eta eremu horretan egiten diren jarduera osagarriek, osatzen dute transmisioaren ildoa.
Txapelketa, beraz, bertsoa zaindu eta geroratzeko egiten den lan horren guztiaren alderdi ikusgarriena da, eta aldi berean, aukera ederra, Nafarroako bertsogintzaren eta euskararen aldeko lan horri bultzada emateko. Nafarroako bertsolariei ikusgarritasuna emanez, bertsogintza sustatu eta gizartean ezagutarazteko aukera emango duen egitasmoa da txapelketa. Gozatu eta gozarazteko unea da txapelketa. Eta horren adibide gorena, finala.
Finalean lanketa mardula izanen dute
Finalak bi atal izango ditu. Lehen atala zortzi bertsolariek jokatuko dute. Bigarren atalera, aldiz, lehen atalera puntuaziorik altuena lortzen dutenak pasako dira, eta haiek jokatuko dute buruz burukoa. Bi atalak batuta puntuaziorik altuena lortzen duen bertsolariak jantziko du txapela. Lehen atala:
Binaka, gaia emanda, hiruna bertso zortziko handian
Binaka, gaia emanda, hiruna bertso zortziko txikian
Banaka, lehen puntua emanda, hiru bertso zortziko txikian
Binaka, gaia emanda, hiruna bertso hamarreko txikian
Banaka, gaia emanda, bi bertso nahi den doinu eta neurrian Buruz burukoa:
Binaka, gaia emanda, zortziko txikian puntutan, zortzi bertso osatu arte
Binaka, gaia emanda, hiruna bertso sei puntuko motzean
Kartzelako lana
Banaka, gaia emanda, hiru bertso nahi den doinu eta neurrian
Sarrerak, salgai
18 euroko prezioa dute sarrera arruntek, eta 13 eurokoa Bertsozale Elkarteko bazkideenak, eta 12 euro 16 urtetik beherakoen kasuan. www.bertsosarrerak.eus atarian, larunbat goizera arte eskuratu daitezke. Anaitasunako leihatiletan, 15:30etatik 17:00etara.