Badugu zer ospatua

Euskalerria Irratia 2018ko aza. 7a, 08:22

> Hitzordua Zentral Kafe Antzokian da, 19:30ean. Ateak ordu erdi lehenago zabalduko dituzte.
> Berri Txarrak-eko Gorka Urbizuk, Joseba Tapiak eta Edozein Bi taldeak entxuferik gabe joko dute. 
> Ekitaldi irekia izanen da, eta irratiko entzuleek, bazkideek, kolaboratzaileek eta iragarleek parte hartuko dute,
> Bidali zorion testu zein audio mezuak whatsapez 608 9189 96 zenbakira.

Euskalerria Irratiak hiru hamarkada beteko ditu azaroaren zazpian. Lizentzia ukapen guztien gainetik eta bazterkeria ekonomiko guztien azpitik irrati iruindarra hiru hamarkada betetzera iritsi bada, bere komunitate ahaltsu eta eskuzabalari esker izan da. Eta komunitate horretako kideei zorionak eta eskerrak emateko festa antolatu du: 8.000 entzuleak, 200 kolaboratzaileak, 1.000 bazkideak, ehunka iragarleak, lagun guztiak daude gonbidaturik.

Berri Txarrak taldeko Gorka Urbizuk entxuferik gabe hiru bat kanta joko ditu; beste horrenbeste eginen dute elkarrekin diskoa prestatzen ari diren Joseba Tapiak, Ion Celestinok eta Nerea Erbitik; eta baita Edozein Bi taldeko kideek ere: Emausko Raperoetako Ritxek eta Soñadores natos taldeko Aingeruk hain justu.

Ordu bete inguruko ekitaldia izanen da, bi hitzartze laburrekin. Helburua da ospatzea Euskalerria Irratia euskaldunon hiri buruzagiaren berezigarri bihurtu dela; izan ere, Eusko Jaurlaritzaren euskarazko komunikabideen kontsumoari buruzko inkestaren arabera, irismenik handieneko tokiko irratia da, eta hiri inguru batean errotzea lortu duen bakarrenetakoa: entzuleen artean %70 euskaldun berriak ditu, %62 goi ikasketadunak eta %60 50 urte baino gutxiagokoak.

Sustrai Colinarekin, elkarrizketatzaileak elkarrizketaturik

Urteurrena ospatzeko, kolaborazio berezia eginen du Sustrai Colinak Euskalerria Irratiarekin, elkarrizketatuak elkarrizketatuz, erran nahi baita ordu erdiko elkarrizketa bana eginen diela irratiko esatariei, eta elkarrizketa esatariaren saioan aireratuko da. Azaroaren 12tik aurrera, astean elkarrizketa bat eginen du Colinak.

Bestalde, urteurrenaren astean bertan, azaroaren bostetik bederatzira, egunero saio bat Irrintzi Dorreko estudioetatik at eginen du Euskalerria Irratiak: entzule baten etxetik, iragarle baten dendatik, kale gorritik… Bestela ere, denboraldi honetan, irratia jada astean behin saio bat egiten ari da Irrintzi Dorretik urrun, hain kounitatearengana hurbitzeko, zorionak eta eskerrak emateko. Dagoeneko Geltoki gunean eta Alde Zaharrean (euskararen ofizialtasunaren aldeko manifestazioaren karietara) izan dira, baita Oltzako, Burlatako eta Barañaingo udaletxeetan ere.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!