Telefono bestaldean beti izan da norbait laguntzeko prest. Urtetik urtera gero eta dei gehiago jaso ditu Nafarroan ere Esperantzaren Telefonoak. Zer nolako jendeak deitzen du baina halako telefono batera? Bada, gehienetan krisi batean murgiltzen hasiak diren herritarrak dira. Krisi emozionalak dituzte eta besterik gabe norbaitek entzutea nahi izaten dute. Jendez inguraturik bizi garen gizarte honetan, gero eta jende gehiagok behar izaten du benetan beste pertsona batek sortu zaizkion arazoen inguruan entzutea. Eta horixe egiten dute Esperantzaren Telefonoaren bestaldean dauden profesionalek.
2018an dagoeneko 7.000 dei jaso ditiuzte, iaz urte osoan adina dei dira horiek. 130 lagun ari dira boluntarioki lanean Esperantzaren Telefonoan. Laguntza eske deitzen dutenen artean gehienak emakumeak dira (nahiz eta azken urteotan joera ere aldatzen ari den) eta gehienak 30 urtetik gorakoak izaten dira. Urteotan guztiotan ikastaroak eta tailerrak ere eskaini dituzte emozieon tratamenduan sakontzeko.
Musika eta umorea 40 urteko lana ospatzeko
Baluarten eginen dute ospakizun berezia Esperantzaren Telefonoko kideek. Musika eta umorea izanen dira ardatz nagusi. 19:00etan hasiko da ekitaldia, eta besteak beste kantariak igoko dira oholtza gainera: Carlos Colina, Leire Lisarri piano jotzailea, Iñaki Fresan baritonoa eta Amaia Azkona sopranoa.
