Civivoxen erabilerak aparraren gisan egin du gora, "norabide aldaketaren ondorioz", Maider Beloki kultura zinegotziaren hitzetan: 2017an, 782.502 lagun joan ziren -353.340 pertsonek utzitako espazioak erabili zituzten eta gainontzeko 429.162ak antolatutako ekitaldietara eta ekimenetara bertaratu ziren-, 2015eko datuekin alderatuz, beraz, %14 gehiago erabili dira Civivox sareko zazpi zentroak. Horregatik, berrikuntzak aurkeztu dituzte: kudeaketa hobea bilatuko dute, Civivox zentroek gaueko 22:00etan itxiko dituzte -orain 21:00etan ixten baitituzte-, programazio lau hiruhilekotan antolatuko dute eta auzoetako "elkarte sareekin" harremanena eginen dute lan.
Orduei dagokienez ere, orain hiru urte baino %45 ordu gehiago erabili dira, utzitako espazioei esker, guztira 39.090 ordu; eta 2016an baino %36an gehiago. Hala, zentroen geletako utziera ere handitu da: ikasturte guztirako lagapenak %9an; tartean-tartekoak, %24an.
Arrakastaren zergatiak nabarmendu ditu Belokik: bat, "era guztietako ekimen soziokulturaletara ireki izana"; bi, "aniztasuna eta oreka" egotea egitarauan; eta hiru, "auzoko elkarte eta kolektiboekin kolaboratu izana".
Erakusketak, arrakastatsuenak
Erakusketetara joaten da jende gehien, 168.426; ikastaroak daude bigarren tokian, 147.720rekin; espektakuloak hirugarrenean, 46.348rekin eta zerrendan, azaltzen dira gero, hurrenez hurren, Iturramako bainuetxea, irakurketa gelak, ordenagailuen erabilepn librea, zinema, hitzaldiak, bisita gidatuak, ateraldiak eta lehiaketak.
