UGTk, CCOOek eta Nafarroako Enpresarien Konfederazioak lan-baldintzak Nafarroan negoziatzeko eskubidea ukatzen dutela salatu dute ELAk eta LABk, izan ere, iaz proposamen bat igorri zien, lanbidearteko akordio bat lortzeko, alegia Nafarroako sektore hitzarmena lehenesteko, Madrilen sinatutakoen gainetik. Ezezkoa eman dute hiruek, ordea.
"Zapateroren Gobernuaren 2011ko lan-erreformak bide ematen die estatu-esparruko hitzarmenei negoziazio-gai jakin batzuk haientzat erreserbatzeko, eta sektoreko probintzia-hitzarmenetan ezarritakoa guztiz edo zati batez deuseztatzeko. Lan erreforma horretaz baliatzen ari dira UGT, CCOO eta Patronalak estatu-hitzarmenak Madrildik ezartzeko", adierazi du Imanol Pascual ELA negoziazio kolektiboko arduradunak, ELAk eta LABek batera eskainitako prentsaurrekoan.
Negoziazio kolektiboaren "estatalizazioa" dela eta Nafarroako langileen lan baldintzak "nabarmen okertzen" ari direla azpimarratu du, ildo beretik, Imanol Carrera Nafarroako LABeko bozeramaileak. Era berean, "Nafarroan erabakitzeko eskubidea bermatuko duen negoziazio kolektiboa" laudatu dute.
EAEn, antzeko akordioa
Euskal Autonomia Eskidegoan, antzeko akordioa erdietsi zuten ELAk, LABek, UGTk, CCOOek eta Confebaskek, Nafarroan ez bezala. Nafarroan, “argudio juridikoak” izan dituzte ardatz hitzarmena ez adosteko, dena dela, ELAko eta LABeko ordezkarien aburuz, EAEko akordioak argi uzten du "arazo teknikorik" ez dela.