Euskararen Nazioarteko Egunaren harira Nafarroako Gobernuak eta Iruñeko Udalak elkarrekin antolatutako kultur jardueren artean antzerkia, bertsolariak, musika emanaldiak edo gazteendako kultura digitaleko laborategi bat daude egitarauan.
“Ane eta ohe hegalaria”
Antzezlan honek "Xaldun Kortin" du oinarri, ahozko tradiziotik berreskuratu diren herri ipuinak, jolasak, esapideak eta kantak XXI. mendeko haurrei helarazteko egitasmoa. Ikuskizuna 0tik 6 urte bitarteko haurrak dituzten familiendako da bereziki, eta 45 minutu irauten du. Antzeztoki guztietan sarrera doakoa da, leku guztiak bete arte. Aktoreak Oier Zuñiga eta Laura Villanueva dira.
Bidaia baten modura ageri zaigu istorioa. Bidaia bat denboran zehar, Nafarroako lurraldean zehar, neskatiko baten ilusioetan zehar eta familia baten bizipenetan zehar. Antzezlanean kontatzen den istorioan “neskatiko bat agertuko da, lo egitea gorroto duena. Amatxik ipuinak kontatzen zizkion ohatzera joan aurretik. Anek lau urte ditu orain, baina amatxirik ez, eta bere gelan bakarrik gelditzen denean, ez du begirik bildu nahi izaten…”.
Emanaldiak
Abenduak 1, Tutera, Fernando Remacha Kontserbatorioa, 18:30.
Abenduak 3, Iruña, Café Teatro Zentral, 12:00.
Abenduak 5, Lesaka, Harriondoa Kultur Etxea, 18:30.
Abenduak 6, Altsasu, Iortia Kulturgunea, 17:30.
Abenduak 7, Tafalla, Kulturgunea, 18:00
Abenduak 8, Zangoza, El Carmen entzunaretoa, 18:00.
Sinopsia
Aneri ez zaio lotara joateko ordua gustatzen. Garai batean, berriz, bai, amatxik
ipuinak kontatzen baitzizkion betazalak poliki-poliki itxi arte. Baina 4 urte bete
dituen honetan, amatxi jada ez dago eta gurasoek ohean musu ematen diote eta alde
egiten dute gauero.
Bere gelako bakardadean, begiak zabal-zabalik mantendu nahian, hasi da amatxik
erakutsitakoekin oroitzen. Tartean, puxtarriak eskuetan hartuta egiten zion jolasa
etorri zaio burura eta panpin bati egin dio berak joko hori: “Ikusi, Pakita, Xaldun
Kortin, pipitt kortin, zenbaten artin?”. Bat-batean hitz magiko horiek hegan jarri
dute ohea!
Ohe hegalariak toki askotara eramanen du Ane eta bere gelara itzuli ahal izateko
erronkak gainditu beharko ditu: gezurrak kontatzeko kantua asmatu, itzalekin ipuina
kontatu, publikoaren laguntzaz igarkizun bat asmatu…
Baina, ohe hegalariaren bidaia ametsa izan al da? Aneren irudipen hutsa? Bada,
zalaparta entzunda, aitatxo sartu da Aneren gelan.
Antzezlan-egokitzapen hau bidaia bat da: bidaia denboran, Nafarroako geografian,
ume baten ilusioetan eta familia baten errealitatean. Herritik jaso eta herriari
itzultzen zaizkion ipuinak, joko-formulak, jolasak, kantuak... etxeko txikienekin
euskaraz aritzeko.
Mikel Arregi Euskarabideko zuzendariarekin eta Oier Zuñiga aktorearekin mintzatu gara antzezlan honetaz.
