Iruñerriko euskaldunon agerkaria
euskalerriairratia.eus

Emakumeenganako indarkeriaren kontrako koordinazio akordioa sinatu dute Nafarroako erakundeek

Euskalerria Irratia 2017-11-24 14:04   Gizartea  Nafarroa

Hirugarreen hitzarmena da, eta indarkeria matxistaren definizio zabalagoa egiten du, 14/2015 Nafarroako legeari jarraiki, elkarlana sustatuz eta jardunbide homogeneoak ezarriz.

Emakumeenganako indarkeriaren kontrako koordinazio akordioa sinatu dute Nafarroako erakundeek
Argazkia: Erakundeetako ordezkariak, Nafarroako Gobernuan, hitzarmena sinatzeko ekitaldian. | Ikusi handiago | Argazki originala

Nafarroako Gobernuko lehendakari Uxue Barkosek, Espainiako gobernuko ordezkaritzako buru Carmen Albak, Nafarroako Justizia Auzitegiko presidente Joaquin Cristobal Galbek, Nafarroako fiskal nagusi Jose Antonio Sanchezek eta Udal eta kontzejuen federazioko presidente Pablo Azkonak izenpetu dute akordioa.

"Osotasunean" ariko dira erakunde horiek guztiak indarkeria sexistaren kontra, "kalitatezko zerbitzua" bermatzeko xedez "hezkuntza, osasun, gizarte, polizia eta justizia arloetan". Akordioak, gainera, "sentsibilizazioa lortzeko", ikerketa eta formakuntza bultzatuko ditu.

"Instituzioen partetik, artatze integrala, diziplina artekoa, sistematikoa eta iraunkorra izan behar da, ardatz gisa esku hartze koordinatua eta urrats bateratuak dituena", adierazi du Uxue Barkos Nafarroako presidenteak.

Indarkeria sexista, zabal ulertuta

Indarkeria Sexistaren aurkako hirugarren koordinazio arkodioak aurreko urteetan baino emakumeen kontrako erasoen definizio zabalagoa egin du, Nafarroako 14/2015 Legeari jarraiki.

Berrikuntzak dakartza: batetik, Departamentuen arteko Batzordea sortuko dute, Nafarroako Gobernuan emakumeen eta gizonen arteko berdintasuna ziurtatu eta administrazioan berdintasun politikak txertatzen direla ikuskatzeko; bestetik, Batera Ekiteko Protokoloa jarriko dute indarrean, "prebentzioa, artatze, babes eta berreskuratze sistema koordinatzeko".

Jada martxan dagoen Jarraipen Batzordea mantenduko du instituzioen arteko hitzarmenak; analisi eta eztabaida organoa da, erakundeen arteko koordinazioa hauspotzeko eta akordioa betetzen ote den aztertzeko.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa