Gaurko osoko bilkuran Alderdi Sozialistak jakin nahi izan du, Administrazioan Euskara Erabiltzeko Foru Dekretua aurrera eraman eta onartzeko asmoa ote duen, Nafarroako Kontseiluak esan ondoren zalantzazko puntu batzuk biltzen zituela.
Ana Ollo, Herritarrekiko eta Erakundeekiko kontseilariak esan du, zalantzarik gabe, laster onartuko dutela Foru Dekretua. Eta gogorarazi dio, Kontseiluak aholkuak eman zizkiola, zenbait puntutan hobekuntzak egin zitezkeelako. Berretsi du, legearen barrukoa dela dekretua eta parte hartzearen bidez sortutako proposamena dela. Bilerak eta ekarpenak ugariak izan direlako, besteak beste.
UPNk eta PPNk euskararen legea aldatzeko aukerez ere hitz egin dute gaurko saioan. Lege honen balizko aldaketaz aritzeko batzordea sortzeko proposamena aurrera atera zen joan den osoko bilkuran. Geroa Bai, EH Bildu eta Podemosen aldeko botoak izan zituen, Ezkerra abstenitu egin zen eta UPNk, PSNk eta PPk aurka bozkatu zuten, baina, UPNren parlamentari bat, Iñaki Iriarte, falta zelako, baiezkoak irabazi eta batzorde hori sortzeko aukera eman zuen.
Gauzak horrela, kezkati agertu dira gaur.
Uxue Barkos Lehendakariak erantzun die biei. UPNri esan dio, horren kezkatua balego, aurreko osoko bilkuran egin ahalak eginen zituen batzorde hori sortzea galarazteko, eta ez zen hala izan. PPri esan dio, euskararen aurkako jarrerekin segitzen duela edozeren gainetik.
