Nafarroako Gobernuko teknikariek egindako ikerketa lan baten emaitzak argiak dira: ESA urtegian egiten ari diren handitzeak ez du segurtasuna ziurtatzen. Barne departamentuko, Garapen Ekonomikoko eta Ingurumeneko tekniko adituak egindako lana izan da. Gobernuak datu horiek ezagututa heldu den urteko aurrekontuetan diru-sail bat bideratuko du nazioarteko aditu talde batek ikerketa lana egin dezan ESAko urtegiaren proiektuaren inguruan. Txosten hori egiten duten bitartean gainera, ESA urtegian abian diren zabaltze lanak geldiarazteko eskatuko du bide beren Gobernuak.
Teknikoek osatu berri duten txostenak jasotzen duena da Ebroko Ur Konfederazioak "gutxietsi" egiten dituela ESA urtegia handitzeak sortu ditzakeen kalteak eta bereziki sortzen duen segurtasun eza han bizi diren biztanleengan. "Naturak berak eta urtegiaren inguruak sortzen duten ezjakintasunak arriskuan jarri dezake eskuin hegalaren segurtasuna eta horrek arriskuan jartzen ahal ditu ESA inguruan bizi diren herritarrak ere", nabarmendu dute txostenean.
Zerk eragiten du ESA urtegiaren segurtasun eza?
Iaz egin zuen aditu talde batek txostena ESA urtegian egiten ari ziren proiektuaren inguruan. Zenbait faktorerengatik uste dute ez dela segurua urtegian egiten ari direna:
- Inguru horretako geologia. Askotarikoa eta zailtasunez betea. Paleomugimenduekin eta irristatzeekin.
- Parametro geotekniko okerrak egin izana urteotan.
- Eskuin hegalean egiten ari diren lanek sortu duten segurtasun eza zenbaterainokoa den aztertzerakoan Ebroko Ur Konfederazioak zehatz ez jokatu izana.
- Urtegia bera nola erantzuten ari den egindako lanen aurrean.
- Larrialdi egoera baten aurrean prestatutako plana.