UPNren "oposizio maltzurraren" aurrean, aldaketa "errotuta" dagoela esan du Geroa Biak, bi urteko legealdiaren balorazio egiteko prentsaurrekoan. Nafarroan, trantsizioa 2015ean hasi zela azpimarratu du Koldo Martinez Geroa Baiko kideak, izan ere, ordura arte ez zen gauzatu, haren ustetan. Aldaketaren gobernutik geroztik, ordea, "akordioaren, negoziazioaren, hitzarmenaren eta gardentasunaren baloreak" mahaiaren gainean jarri dituzte.
Halaber, aldaketa "soseguz" egiten ari dela adierazi du, "lasai, tentuz, eraginkorki, arduratsuki, sozialki eta, aldi berean, sakonki".
Lau espurreren gerizan
Lortutakoari begira jarri da Geroa Bai. Legealdiaren balorazioa egiteko, lau esparru zehaztu ditu: gizarte politika arloan eta murrizketei aurre egite aldera "lortutakoa", bizikidetza eta eskubideen lorpenean emandako "aurrera pausoak", instituzioen "demokratizazioa" eta azkenik, egungo gobernuaren jarraipen jarduera.
Abidura handiko trena, pitzadura iturri
Abiadura Handiko Trena. Horra legealdiko balorazioa egiterakoan ateratako beste gaietako bat, urak ez baitaude bare. Madrilekin negoziazioak eteteko eskatu zioten gobernua sostengatzen duten taldeek Geroa Bairi. Martinezen, hitzetan, baina, akordio programatikoan dagoen trenaren defentsan baino ez da ari Geroa Bai.
Hain justu, prentsaurrekoa eskaini zuten aurreko astean EH Bilduk, Ahal Duguk eta Ezkerrak, Abiadura Handiko Trena arbuiatzeko. Martinez kexu azaldu da, haren ustetan, gobernua sostengatzen duten taldeen arteko ezberdintasunak jarraipen batzordean tratatu behar direlako eta ez prentsaurrekoak emanez.
