Armagabetzea "bermeekin, segurua, behin betikoa eta egiaztagarria" izatearen alde azaldu dira Geroa Bai, EH Bildu, Ahal Dugu eta Ezkerra, akordio programatikoan jaso zuten gisan; dena dela, ez dirudi ETAren adierazpen bateraturik lortuko dutenik Nafarroako Parlamentuan. UPNk eta PPk armagabetzeaz gaindi, "barkamena eskatzeko eta irekita dauden kasuak konpontzen laguntzeko" exijitu diote ETAri; gainera, EH Bildurekin akordioa erdiesteko ere zailtasunak izanen dituztela jakinarazi dute, oraindik gaiari buruz solasean hasi ez diren arren.
Gordin mintzatu da UPNko kide Javier Esparza: EH Bilduk "hilketak, mehatxuak eta bahiketak babestu" dituela esan du, eta, beraz, ez duela haiekin negoziatzeko asmorik.
Akordio programatikoa, gakoa
Gobernua sostengatzen duten lau taldeek, aldiz, esan dute akordio programatikoan bildutakoa izan daitekeela apirilaren 8ko armagabetzearen inguruan irakurketa bateratua kaleratzeko gakoa. Bertan armagabetzea "behin betikoa eta egiaztagarria" izan dadila adostu zuten Geroa Baik, EH Bilduk, Ahal Duguk eta Ezkerrak .
Koldo Martinez Geroa Baiko parlamentariak esan du horiek bete beharreko gutxienekoak direla eta, bestalde, instituzioek ere esku hartu behar dutela armagabetzea laguntze aldera, Nafarroako Gobernuari eta Eusko Jaurlaritzari egin die erreferentzia: "legalitatea eta segurtasuna bermatuz, armagabetza izateko kudeaketetan lagundu behar dute".
Euskal Herria Bildu koalizioko ordezkari Adolfo Araizen irudiko, akordio programatikoan dagoena lan egiteko "oinarrizko tresna" da. "Positiboki baloratu behar dugu ETAren behin betiko armagabetzea"
Laura Perez Ahal Duguko kidek esan du, ilde beretik prozesua lagundu egin behar dela, eta ez trabak jarri: "Gobernuek bakearen aldeko jarrera behar dute, bidea errazte aldera".
