Bardeako Tiro Eremuaren Aurkako Batzarrak antolatu du XVIII. martxa Bardeako tiro eremua desegiteko eskaera egin eta NATOren azpiegitura militar hori ixteko eskatzeko. “Krisiak areagotu egin du Bardeako tiro poligonoa eraisteko eskaeraren garrantzia”, hala nabarmendu dute agerraldian Milagros Rubiok eta Marisa Marquesek Bardeako Tiro Eremuaren Aurkako Batzarreko kideek. Gastu militarren auziak ere kezka sortzen du: Diru hori gizarte gaietara bideratzeko eskatu dute batzarreko bozeramaileek. “Krisi ekonomikoari kudeaketa negargarria gehitu behar zaio, zerbitzu publikoetan egindako murrizketak eta oinarrizko eskubideen galerak ahaztu gabe”, ohartarazi dute.
Bardearen inguruko herrietarako industria sustatzea eta lanpostuak sortzea litzateke aukerarik onena martxaren deitzaileen ustez. 1951. urtean zabaldu zuten Bardeako tiro eremua. Geroztik, NATOko hamaika hegazkinek baliatu dute bonbardatzeko. Rubiok nabarmendu du Espainiako armadak urtero egiten dituela ariketa militarrak benetako munizioarekin. "Urteotako guztietako bonbardaketek tiro eremuaren inguruan bizi garenontzat zer-nolako ondorioak izan ditzaketen ez dago argi, ez baitugu batere informaziorik jasotzen". Rubiok erantsi du tiro eremuak hartzen duen tokia Biosferaren Erreserba badela, bai eta Naturgunea ere.
Ekainaren 7an protesta
Goizeko 11:30etan elkarretaratzea eginen du Bardeako Tiro Eremuaren Aurkako Batzarrak Agilaresen eta 12:00etan tiro poligonoraino eginen dute martxa. Komunitatea irakurri eta bazkari autogestionatua eginen dute.