Belateko eta Almandozko tunelek sortzen dute kezkarik handiena NA-121-A errepidean. Noiznahi izaten dira istripuak edo suteak. Tunelek ezin dute horrenbesteko auto jarioa jasan. Hala uste dute 29 Udaletako ordezkariek. "Izaten diren arazoei irtenbide egokia eta behin betikoa emateko eskaera erregistratuko dugu Nafarroako Gobernuan", hala nabarmendu du Olabeko alkate eta Oronoz-Mugaireko suhiltzaile Mikel Uriartek.
"Errepide horretan sortzen diren trafiko arazoei aurre egiteko, aitzitik, diagnostikatu egin behar da zerk sortzen duen arazoa. Ebaluazioaren ondotik, aztertu behar dira soluzio posibleak eta ondoren ekin egin behar zaio egokitzeari eta neurriak hartzeari", 29 Udalek sinatutako instantziak horixe da Gobernuari eskatzen diona.
Alde batetik, tunelak egokitzeko beharra jaso dute eta bestetik, segurtasuna ziurtatzeko beharrezkoak diren neurriak hartzea. Ohartarazi duten bestea, trafiko astuna handia dela errepide horretan eta segurtasun plangintzan hutsuneak daudela.
Errepidea bikoiztu baino lehen, beste aukerak landu
A-15 autopista baino, askok nahiago izaten dute NA-121-A hartu eta horrek trafikoa ugaritzea sortu duela nabarmendu dute: "Europa mailan, trafiko astun gehien jasotzen dutenen artean hirugarren postuan daude tunel horiek".
Errepidea bikoiztea baino, lehenago azterketa sakona egitea beharrezko jotzen dute Udaletako ordezkariek, jakin ahal izateko zein litzatekeen aukerarik onena egoera hobetze aldera. "Bikoiztu baino, trafikoan mugak jarri edo ordutegi zehatzak finkatzea kamioi astunak igarotzeko, adibidez".
Sustapen Departamentuarekin izan ziren martxoan bilera batean. Orain, euren eskaerak eramanen dizkiete.