Hezkuntza Departamentuak oraindik ez du erabaki 2024-25 ikasturtean zein ikastetxek izango dituzte bi urteko gela horiek, baina, hala ere, 0-3 Plataformak uko egin dio Lehen Hezkuntzako ikastetxeetan bi urteko gelak sortzeko erabakiari. Nahiz eta bazirudien hezitzaileen protestek proposamena atzera botatzea lortu zutela, Hezkuntza Departamentuak irtenbide horrekin aurrera jarraitzea erabaki du.
Hezitzaileek adierazi dutenez, sistema hori "galera handia da haurrentzat eta ez ditu haien beharrak asetzen". Irtenbide hori, "0-3 zikloaren unibertsaltasunari erantzuteko plaza publiko nahikorik ez dagoenez, Foru Gobernuarentzat merkeena den bide ekonomikoari erantzuten dio", salatu dute.
Eider Garde 0-3 Plataformako kideak zera azaldu du: “bi urteko haurrak ez daude prest 3-6ko sisteman sartzeko; bestelako beharrak, espazioak eta metodologiak behar dituzte”. Eta Gardek gaineratu du, "0-3 zikloaren hausturak haurrak azkarrago haztera eta heztera behartzen ditu, integratzeko denborarik gabe, eta haien garapen-prozesuak oztopatuz". Hezitzaileek argudiatu dute gainera, bi urterekin, haurrak ez daudela prest eskolan erreferente bakarra baino gehiago izateko; Hezkuntzaren irtenbideak planteatzen duen bezala.
STEILAS sindikatuak ere gaitzetsi du erabakia. LH-ko ikastetxeak ez daudela egokituta berretsi dute, eta gainera, 0-3 zikloaren haustura dakarrela horrek. Haur eskoletan lan egiten duten profesionalen kalterako neurria dela salatu du halaber sindikatuak.
