"Ahalik eta lasterren eta modu irmoan" Nafarroako erakundeek frankistei egindako omenaldiak berrikus ditzala eskatu zion ostiralean parlamentuak Nafarroako Gobernuari. Horri kasu eginen diotela esanez abiatu du gaur gobernu saioaren osteko pentsaurrekoa Elma Saiz bozeramaileak. Gobernuak memoriarekin konpromisoa duela esan du Saizek, eta legea beteko dutela. Baina kazetarien galderei emandako erantzunak aztertuz, beste zerbait ondorioztatu daiteke.
Frankismoko biktimen babeserako legea jarraituz, sinbologia frankista biltzen duen azterlan bat eskatu zion NUPi gobernuak 2016an, gero horiek ezabatzeko eta bertan behera uzteko. Unibertsitateak 29 izeneko zerrenda osatu zuen, non Felix Uharte eta Miguel Javier Urmeneta enpresariak ageri diren. Gobernuak, ordea, batzorde teknikoan txostena aztertu ondoren, zerrenda aldatu zuen. Lehenengo zerrendako hamasei izen desagertu ziren, eta zazpi teniente eta general frankista gehitu zituzten azkenean gobernuak onartutakoan. Orain, "legea betetzeko", azken zerrenda hori du oinarri gobernuak. Aurreko astean emandako bi arrazoiak errepikatu ditu gaur bozeramaileak: saria "kolektiboa" izan zela eta gobernuak onartutako zerrandan ez daudela enpresariak.
Bi aukera izan daitezke argudio horiek gainditzeko. Gobernuak 2016an onartutako gobernu akordioan memoriaren zuzendari nagusiari errolda eguneratuta izateko eskatzen zaio. Egingo balu, izen horietara iritsiko lirateke. Baina aukera gutxi ditu honek, Martin Zabalzak onartu baitu "adostasuna" behar dela horretarako.
Bigarren zirrikitua Madrilek Uharteri lan arloko merituaren urrezko domina kentzeko erabilitako txostena da. Nafarroak eskatu dio Espainiari, baina oraindik ez dute jaso.
