Gaur egin dute lehen bilera. Astelehenean, lehen entseguak eginen dituzte. Proiektuaren sorburua Paris 365ek eta Aods Teatroak konpainiak elkarlanean antolaturiko Giza Eskubideak Eszenara zikloan dago. Orain, "pobrezia eta gizarte-bazterketako egoeran dauden pertsonei ikusgarritasuna emateko" jarri dute abian Aporafobnia Stop proiektua.
Pariseko Jantoki Solidarioaren erabiltzaileek antzezlanaren eszenografia eraikiko duten Zorokiaingo tailer batekin elkarlanean. Entseguak Zizur Nagusian, Atarrabian eta Antsoainen eginen dituzte.
Eszenografia hori Curro Claret sortzaile katalanak diseinatutako 50 aulkik osatuko dute, erreziklaturiko materialekin egindakoak.
Aulkien eraikuntza Zorokiaingo Tantai Zurgindegian eginen dute, "20 urtez jenderik gabe egon den herria, eta orain Zorokiain-Errekazar elkartean bildutako dozena bat familia gaztek berreskuratu dute". Horrela, "birziklatutako" populazio batek material birziklatuekin egindako eszenografia baten eraikuntza hartzen du, nolabait, "birziklatzen ari diren" pertsonek egina.
Aulki horiek espazio eszenikoa osatuko dute, eta, aldi berean, "diseinu bakarreko objektu bereziak dira, eta Aporofobia Stop proiektuaren autokudeaketari laguntzeko balioko dute", baterako finantzaketa eta mikrodonazio kanpaina baten bidez. Horretarako, hainbat erakunderen eta, oro har, herritarren lankidetza bilatuko da.
Aporafobiari aurre egitea xede
Adela Cortina filosofoak sortutako terminoa da aporofobia, "pobreenganako arbuioa, beldurra edo gorrotoa" definitzeko. "Askotan, beste gaitz batzuen jatorrian dago, hala nola xenofobia, homofobia, arrazakeria eta abar". Eta, zehazki, "aporofobiaren ondorioak pairatzen dituzten pertsonei eman nahi zaie hitza proiektu honekin". Horren bidez, "arte eszenikoak pobrezia, etxegabetasun edo ahultasun sozial eta ekonomikoko egoeran dauden pertsonak modu positiboan ikusarazteko eta eraldatzeko tresna gisa erabili nahi dira, eta horietan ahalduntze-prozesu bat sortu, hainbat sormen-prozesuren bidez".