Udaltzaingoaren bulegoetatik telematikoki erantzun dituzte gaur epailearen galderak Iruñeko Arrotxapea auzoan eta Burlatan atxilotutako hamar gazteak. Eguerdian zabaldu denez, ETAren zatiketa baten ondorengo taldea osatzea egozten zaie gazteei. Baina epailearen autoak ez du halakorik jasotzen, hitzez hitz. Lauri desordena publikoa, atentatua, kalteak, lesioak eta talde kriminaleko kide izatea egotzi diete; beste hiruri desordena publikoa, atentatua, kalteak eta lesioak, eta gainerako hirurei lesio-delituak.
5 zenbakiko Instrukzio Epaitegiko epaileak ez du kautelazko neurririk hartu eta aske utzi ditu behin behinean. 14:30ean askatu dituzte, banan banan. Txaloka hartu dituzte senide eta lagunek. Espainiako Poliziak asteartean atxilotu zituen, eta bi egun eman dituzte atxilotuta. Beste bi gazte deklaratzera deitu zituzten atzo, beraz, hamabi dira auzian inplikatutakoak.
Poliziak egindako txosten batean oinarritu dute polizia operazioa. Abokatuetako batek senideei jakinarazi dienez, eta Berria egunkariak jaso duenez, txosten horretan jaso dute ETAren zatiketa baten ondorengo taldea osatu dutela gazteek. Zazpi liburuki ditu txostenak eta, abokatuek ikusi ahal izan dutenez, gazteen arteko telefono deien transkripzioak, txartelak, bertso saioen eta kultur ekimenen inguruko informazioa jasotzen dute. Abokatuek denbora gutxi izan dute txostena gainbegiratzeko. Sei abokatu ari dira gazteen defentsa lanetan, horietako bat ofiziozkoa.