Nafarroa Suspertu planaren irizpenak "errenta altuentzako eta enpresentzako pribilegioak mantentzen" dituela kritikatu du ELAk

Euskalerria Irratia 2020ko eka. 26a, 09:19
ELA sindikatuaren Nafarroako egoitza.

ELA sindikatuaren arabera, atzo parlamentuko osoko bilkuran onartutako irizpenak balio du Nafarroa Suspertu planaren ildoa zein izango den ikusteko. Haren ustez, planak "errenta altuei eta enpresei pribilegioak mantenduko dizkio". Gainera, azpimarratu duenez, diktamena ez da loteslea, eta "Nafarroako Gobernuaren esku geratzen da planaren azken idazketa".

Sindikatuak ohar batean ohartarazi duenez, "zerga politikan aldaketarik ez badago, Sozietateen Gaineko Zergaren bidez zerga bilketa handitzeko eta errenta altuenei zerga karga handitzeko, murrizketak eta murrizketa politikak itzuliko dira". Zentzu horretan, "enpresek, eta batez ere enpresa handiek, tratamendu pribilegiatua dute Nafarroan, Sozietateen Gaineko Zergaren presio fiskala Estatu osoko txikiena baita".

Hori dela eta, parlamentuan onartutako irizpenak "bilketa handitzeko neurririk ez" duela aurreikusten kritikatu du, "Aurreikusitakoa % 20 baino gehiago erortzea denean, eta are gutxiago hori tratu pribilegiatua duten errenten kontura izatea". Halaber, "Ez du aurrekonturik aurreikusten eta ez du proposatzen dituen neurriak nola finantzatuko diren aipatzen".

ELAk azpimarratu duenez, irizpenak "benetan positiboak izango liratekeen neurriak jasotzen ditu, baina ez daude ez parlamentuaren ez Nafarroako Gobernuaren esku (adibidez, Konstituzioaren 135. artikulua eta Aurrekontu Egonkortasunari eta Finantza Iraunkortasunari buruzko Lege Organikoa indargabetzea), eta, aldiz, eskumenak eta erantzukizun zuzena badaude, ez da erabakirik hartzen, zerga-politikarekin gertatzen den bezala".

Bestalde, irizpenak "elkarrizketa sozialaren" alde egitea aurpegiratu dio, "historikoki UGT, CCOO eta patronala finantzatzeko baino balio izan ez duen sarea". "Elkarrizketa sozialeko sistema hori patronalaren neurrira egina dago, bere interesei kalte egiten dien edozein akordiori betoa jartzeko aukera ematen baitio, eta azkenean Gobernuaren politika antisozialak legitimatzen dituen tresna bihurtzen da", gaineratu du.

ELAk Nafarroako Gobernuari eta talde parlamentario guztiei "sinesgarritasun falta horretan sakontzen ez jarraitzeko" eskatu die, eta Elkarrizketa Sozialerako Kontseilua bertan behera uztea eskatu du.

Sindikatuak "krisiari irtenbide justua ematearen eta 2008ko formulak ez errepikatzearen" alde egin du. "Nafarroako Gobernuaren eta Parlamentuaren esku dago, borondate politikoa baino ez da behar krisi hau berriro langileriaren eta kolektibo ahulenen esku ez geratzeko", gaineratu du.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!