Atzera bota dute Berriobeitiko hainbat lanpostuetan euskara eskakizuna baliogabetu zuen epaiaren aurkako helegitea

Euskalerria Irratia 2020ko mai. 8a, 08:41

Epaiaren arabera, "zuzenbidearen aurkakoa" da idazkariaren, kontu-hartzailearen, aparejadorearen, gazte-teknikariaren eta aguazilen lanpostuak betetzeko euskara jakitea derrigorrezkoa izatea.

Nafarroako Administrazio Auzitegiaren ebazpenaren aurka Berriobeitiko Udalak jarritako helegitea atzera bota du Iruñeko Administrazioarekiko Auzietako 2. Epaitegiak, 2018ko plantilla organikoko hainbat lanpostu eskuratzeko baldintza gisa euskara eskakizuna baliogabetu baitzuen.

Osoko bilkuraren erabaki bidez onartu zen plantilla organiko hura; baina Cristina Recaldek helegitea jarri zuen horren aurka Nafarroako Administrazio Auzitegian. Cristina Recalde 2015ean Berriobeitiko Udalerako UPNren hautagaitzako kide izan zen, eta gaur egun Navarra Sumako Artikako Kontzejuko presidentea da.

"Plaza jakin batzuetan euskara eskatzeari dagokionez Recalderi arrazoia ematen zion ebazpenaren aurka egin zuen geroago Berriobeitiko Udalak, Plazaolaren eta Bilduren eskutik", azaldu du Navarra Sumak ohar baten bidez, eta nabarmendu du Administrazioarekiko Auzietako Zuzendaritzak "berretsi" egiten duela orain ebazpen hori eta "udala kostuak ordaintzera kondenatzen" duela.

Epaiaren arabera, "zuzenbidearen aurkakoa" da idazkariaren, kontu-hartzailearen, aparejadorearen, gazte-teknikariaren eta aguazilen lanpostuak betetzeko euskara jakitea derrigorrezkoa izatea.

Era berean, Berriobeiti dagoen eremu mistoan euskaraz artatua izateko eskubideari dagokionez, honako hau dio: "Eskubide hori herritarrei udalera hizkuntza horretan jo ahal izatea baimentzean datza, eta, beraz, ez da zabaltzen eremu euskaldunean gertatzen den bezala ahozko edo idatzizko erantzuna lortzera".

 

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!