Hasteko, burura dator Laboari lehen aldiz oholtza gainean kantaren parametroak betetzen ez zituen pieza hura entzun genionekoa. Ez, hura ez zen ordura arte kantatzat geneukan jenerokoa. Esango nuke auzo-lotsa apur bat ere sentiarazten zigula, barre herabeak han-hemenka, komikotasunetik ulertu behar ote zen zaparrada hura. Baina Laboa gizon serioa zen, medikua ere bai… Laster hasi ginen ulertzen abestiak ez zirela bakarrik errima eta melodia neurtuak; horiek gainditu eta espresionismoa ekarri zigun Laboak kantagintzara.
Jon Maiak, dantzari eta koreografoak, esan du garai hauetarako oso egokia dela “Komunikazio-inkomunikazioa”. Froga egunkariaren azalean bertan dator, ikuskizunaren argazkia inguratzen duten gainerako osagaietan. Izenburu nagusiak dio, juxtu “Komunikazio-inkomunikazioa” ikuskizunaren argazki gainean, euskara eta kultura ez direla sartuko Jaurlaritzaren marra-gorrietan; alegia, ez dela batere erraza izango halako muntaiarik egitea etorkizun hurbilean.
