Nafarroako Nekazal Produkzio Ekologikoaren Elkarteak (NNPEK) hilabetero antolatzen duen EKOmerkatuak 5 urte beteko ditu larunbata honetan, martxoak 1ean, eta modu berezi batean ospatuko dute. Ohi bezala Geltokin egongo da ikusgai, goizeko 10etatik 14:00etara. Bertan, ekoizle ekologikoak bilduko dira, elikadura ekologikoaren ekoizpenera eta sustapenera bideratutako hainbat jarduerarekin.
NNPEK ohar bidez jakitera eman duenez, produktuen salmentaz gain, larunbata honetan merkatu berezia antolatuko dute. Batetik, 12:00etan, Imanol Ugarte eta Jabier Leozek osatzen duten Talka Txalaparta bikoteak ikuskizuna eskainiko dute eta bestetik, ONAY Gobernuz Kanpoko Erakundeak antolatutako "Siwatl: emakumeak etorkizuna lantzen" argazki erakusketa ikusgai egongo da. Elkarteak jakitera eman duenez, “erakusketaren ardura duten emakumeek ekitaldia dinamizatuko dute, bertaratutakoei galdetuz zer den haientzat elikadura-subiranotasuna".
EKOmerkatuan hilabete guztietako lehenengo larunbatean aurkitu ohi diren elikagaiak ere ez dira faltako: Artzibarko ogia eta pastak; Lizarraldeko olioa, gazta eta lekaleak; Caparrosoko sasoiko barazkiak; Ekollaondoko arrautzak eta ahuntz gazta; Arbeitzako eta Eulzko eztia; Faltzesko eta Eulzko olioa eta almendrak; Baztango gazta urdina eta lekaleak eta Munarrizko patatak. Gainera, bi salmenta puntu berri aurkituko dira: Artiedako Conservas Gukalde eta Errioxako olio aromatikoekin eta infusioak prestatzen dituen Lurreko Aromaticas ekoizleak.
EKOmerkatuaren bosgarren urteurrena larunbata honetan, martxoak 1, ospatuko da Geltokin, 10:00etatik 14:00etara.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!