Katakrakek eta Coop57k hilabeteak eman dituzte lanean, Iruñeko Kale Nagusiko 54 zenbakiko eraikina erosteko moduaren bila. Eraikina XVIII. mendean egin zuten, eta azken hamarkadotan Huarte Soltxaga familiarena izan da. “Luxuzko etxebizitza edo pisu turistiko bihurtu ordez, erakina ehun soziala eta auzoa indartzeko erabiliko dugu”, iragarri dute.
Erositako eraikina Katakrak liburuaren ondoan dago, eta liburu-dendaren eraikina ere bere garaian Huarte Soltxaga familiak saldu zien. Katakrakek 2013an zabaldu zituen ateak, eta ordutik Iruñean funtsik handiena duen liburu-denda bihurtzea lortu du, 22.000 libururekin. Horretaz gain, kantina-jatetxea dauka, baita erabilera askotariko aretoa ere. Hilean, batez beste, 30 ekitaldi antolatzen dituzten horretan. Argitaletxea ere badute, eta dagoeneko ehundik gora liburu plazaratu dituzte.
Zerbitzu finantzario etiko eta solidarioak
Coop57 kooperatibak 1995etik zerbitzu finantzario etiko eta solidarioak ematen ditu. Haren helburua ekonomia soziala eraldatzea da, ongizate soziala sustatzen duten proiektuak bultzatuz. Horretarako, mailegua eraldaketa tresna positibo bihurtzen dute, irabazi ekonomikoak bilatu ordez.
201ean, Coop57k Euskal Herrian adar bat sortu zuen, Koop57, eta dagoeneko hainbat proiektu sozial eta eraldatzaile lagundu dituzte. Egun, Koop57k baditu 328 bazkide, erakundeen eta gizabanakoen artean.
