Subjektu bolleroa definitzea eta horren inguruan hausnartzea izan da asteburuan egindako topaketen helburua. Gizon eta emakume kategoriak deuseztatzeaz, eta "emakumetasunari eta normatibitateari aurre egiteko" estrategia baten beharraz mintzatu dira Leitzako Bollotopaketetan.
Gaur egungo galdera, eztabaida eta erronkei begira jartzeaz gain, iraganari ere heldu diote, orain dela 40 urte Euskal Herriko lesbianen lehen topaketak antolatu zituztenei eskertzea eta aitortza eginez.
Borroka intersekzionala eta beste borrokekin aliatua dagoen borroka dela adierazi dute mahai inguruetan, emakumeen arteko harremanetatik harago doana eta emakumetasunaren ideiari ere ihes egiten diona. 500 pertsona inguru batu dira hausnarketa horiei heltzeko.
Besteak beste, ahalduntzeaz aritu dira eta Kattalin Minerrek iritzi dio “bollera izatea disidentziarako leku bat” dela. Mahai-inguru, hitzaldi, bertso saio eta musika artean egin dituzte hausnarketok asteburuan Euskal Herriko bollotopaketetan, Leitzan.
