Ipar Hegoa Fundazioak egindako Ikusmiran, Nafarroako langileriaren lan eta bizi baldintzak izenburuko txostena aurkeztu du gaur LAB sindikatuak. Langileen erdia prekarietatean bizi dela ondorioztatu dute. Hau da, 178.175 nafar langabezia egoeran, egoera inaktiboan edo 1.400 eurotik beherako diru sarrerekin bizi da.
Nafarroako bi langiletik bat prekarietate egoeran bizi dela egiaztatu du @LABnafarroa sindikatuak
— Euskalerria Irratia (@fm983irratia) December 1, 2022
👉 Gobernuak egoeraren irakurketa okerra egiten duela salatu dute Edurne Larrañagak eta Imanol Karrerak. pic.twitter.com/O1pkfrVkER
Alor gehiago landu dituzte txostenean. Pentsiodunen %40k 1.000 eurotik beherako pentsioa jasotzen du eta, horien artean, 3tik 2 emakumezkoak dira. Txotenaren arabera, 2020.urteko Nafarroako pobrezia arrisku tasa %21,3koa baita. Hau da, nafarren %21ek baino gehiagok, pobreziaren mugaren azpiko diru sarrerak ditu (urtean 11.549 € edo gutxiago). Enpleguaren kalitatean ere jarri behar du arreta sindikatuak. Kontratu mugagabeen kopurua igo bada ere, Nafarroako behin-behinekotasun tasa (%28,27) Europar Batasuneko altuenen artean dagoela ondorioztatu dute (%14,5).
Egoeraren aurrean, 1080 euroko pentsioak, 30 orduko lanaldia eta erretiroa 60 urtera murriztea beharrezkoa dela azpimarratu du LABeko Nafarroako bozeramaile Imanol Karrerak. "Hiru neurri horiek ezin ditugu Nafarroan ezarri, egungo marko legalak debekatzen duelako", salatu du. Foru Hobekuntzaren tresna agortuta dagoela uste du LAB sindikatuak, eta Nafarroak bere subiranotasuna berreskuratu behar duela.
