Gazteluko Plazan barrarik ez jartzeko eskatu diote auzotarrek udalari

 Iruñeko Udalak Gazteluko Plazan 2022ko Sanferminetako jai eredua errepikatzeko asmoa duela iragarri du, azaroaren 21ean Sanferminetako Mahaiak egin zuen bileraren ondoren. “Harridura eta erabakiarekiko arbuioa” erakutsi dute Gazteluko Plazako auzotarrek.

Irailaren amaieran elkartu ziren Enrique Maia alkatearekin eta María Garcia Barberena Kultura zinegotziarekin. “Bileran, Gazteluko Plazako aurtengo jai ereduaren auzokideen balorazio txarra helarazi genien. Maiak eta Garcíak jai ereduaren arrakasta azpimarratu zuten, baina arrakasta hori oinarritzen dute Dj-en kontzertuetara joandako ia 300.000 pertsona kopuruan eta guk nekez onar dezakegu festa baten balorazioa bakarrik kuantitatiboa izatea”, azaldu dute.

 Auzotarren iritziz, “ulerkor” agertu ziren udal ordezkariak agertu zuten argudio batekiko: “Hau da, plaza ez dagoela prestatuta 300.000 pertsona jasotzeko, eta horrek berarekin dakarrela plazak eta haren inguruak alkoholez, pixez eta zakarrez gainezka egitea”. Auzotarren iritziz, halaber, plazak ez du taberna gehiago behar. Sanferminetan terrazen azalera “nabarmen handitzen” dela salatu dute, eta plaza inguratzen duten kale hurbilenetan beste 54 taberna daudela. “Horregatik, ez dugu ulertzen zergatik sartu nahi duen udalak alkohol gehiago berez alkohol nahiko dagoen eremu batera”, diote. "Udal agintarien esanetan, botilatzarra saihestu nahi zuten barra horiek jarrita, baina azkenean, eredu berriarekin plaza botilatzar erraldoi bat bihurtu zuten".

Musikaren bolumena ere kritikatu dute auzotarrek, eta auzo eragileen aurka argudio hori ez erabiltzeko eskatu diote. "Gure bileretan auzoan egunean zehar aritzen diren txarangak ez dira arazo gisa aipatu, eta, beraz, udalari eskatzen diogu ez ditzala gure zarata kexuak aitzakiatzat hartu, auzoan egunean zehar atera nahi duten txarangei horretarako baimena ukatzeko. Zaratak iturri ugari badu ere, guk udal-agintariei adierazitako zaraten arazoa gehiago dator plazako eta inguruetako ostalaritza-jardueratik eratorrita, taberna batzuetako dezibelio handiak eraginda edota asteburu askotan plazan megafonia-bolumen handiarekin egiten diren era askotako ekitaldietatik", adierazi dute.