Iruñea Antitaurina taldeak kritikatu egin du Entzierroaren Mahaiak atzera bota izana hiriko zezenketen inguruko eztabaidaren aldeko proposamena, eta "etorkizuneko sanferminak nolakoak izango diren" eztabaidatzearen alde agertu da.
Ohar batean adierazi duenez, "Iruñeko Udalak sanferminei buruz zabaldutako iradokizunen postontzian herritarrek aurkeztutako 118 proposamenetatik zortzi zezenketak arbuiatzen eta hirian horri buruzko eztabaida baten beharrean sakontzen zuten proposamenak ziren, eta hamabi, berriz, protaurinoak".
"Jakin dugu zezenketen aurkako proposamenak Entzierroaren Mahaira eraman zirela eztabaidatzeko, eta baztertu egin zirela", kritikatu du kolektiboak, eta mahai horrek "herritarren proposamenak baztertzeko inolako zilegitasunik ez" duela uste du, "entzierroaren gai teknikoetan soilik aritzen baita".
Iruñea Antitaurina taldeak azaldu duenez, astearte honetan aurkeztu zituen Sanferminetako Mahaian hainbat azterlanen datuak, "zezenketen aurkako jarrera Nafarroako gizartean eta Estatu mailan gero eta handiagoa dela erakusten dutenak". Gainera, nabarmendu duenez, "2007 eta 2019 urteen artean zezenketek %63,4 egin zuten behera Espainiako Estatuan, eta pandemia baino lehen, 2019an, toreatzaileen %18,26k baino ez zuten toreatu, eta zezenketako ganadutegien %26,69k soilik saldu zuten animaliaren bat toreatzeko".
"Etorkizunera begiratu behar dugu, eta etorkizuneko sanferminak nolakoak izango diren eztabaidatu behar dugu guztion artean; izan ere, erabaki garrantzitsua da hiriarentzat, Entzierroaren Mahaian dauden pertsonek eta interesek ezin baitute hartu", defendatu du.
Sanferminetako entzierroak eta zezenketak banatzeko erabakia "herritarren borondatearen araberakoa" izango dela azpimarratu du kolektiboak. "Animalien aurkako tratu txarrekin eta zezenketen erabateko krudelkeriarekin amaitu behar da, tortura eta animalien heriotza ezin baita izan gure jai maiteen oinarria. Etorkizuneko Sanferminetako eztabaidari heldu behar dio hiriak", aldarrikatu du.
Iruñea Antitaurina taldeak sanferminetako zezenketen inguruko gogoeta eskatu du
Proposamena Iruñeko Udalari helarazi diote, baina Entzierroaren Mahaiak baztertu egin du
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
