Helegiteak banaka aurkeztu zituzten Mendillorriko Bideberri Elkarteak, Arrotxapeko Batean Federazioak, Txantreako SinarZubi Federazioak, Aldezar Elkarteak, Arrosadia-Azpilagañako Yoar Elkarteak, Etxabakoitz Bizirik Elkarteak, Buztintxureando Txuri Elkarteak eta Umetxea Sanduzelai Elkarteak. Talde horiek ez zituzten udalak ezarritako baldintzak onartu; alegia, kontratuak aldatzea, auzoetan udarako programatutako jarduerak etetea eta udal kolonien ardura beren gain hartzea.
Auzitegiak talde komunitarioen argudioak babestu ditu eta udalaren justifikazioak baztertu. Irizpenean azaldu du covid-19ari lotutako araudiak ez duela kontratazio publikoaren araudiaren aplikazioa mugiarazten. Beraz, uste du ezin dela aldaketarik egin, ez bada "hori justifikatzen duten interes publikoko arrazoiak daudelako, eta arau juridiko horrek ezarritako mugekin". Hau da, koronabirusaren pandemiari buruzko araudiak ezin duela kontratu aldaketak gaitzen dituen titulu gisa jardun, eta kasu bakoitzean interes publikoa justifikatu eta zehaztu behar dela.
Halaber, epaitegiak zehaztu duenez, udalak emandako justifikazioa "ez da nahikoa"; izan ere, "ez dago azalduta zergatik ezin diren egin hasierako kontratuan jasotako udako jarduerak, eta zergatik hartzen den egokitzat beste urte batzuetan modu autonomoan eta independentean egiten diren kanpamenduekin edo udalekuekin ordezkatzea. Baztertu egin du, hala, udalak osasun arriskuagatik auzoetan jarduerak egiteko ezintasunari buruz egin zuen aipamena, zehaztasun faltagatik eta erabilitako argudioengatik.
Ebazpenean kontratuaren aldaketa pleguan aurreikusita ote zegoen ere zehaztu du, eta udalaren planteamenduak kontratuaren funtsezko edukiari eragiten ziola ondorioztatu du.