Iruñeko udal haur eskoletan euskara eskaintza handiagoa eskatzen duen HE Gurasoak taldeak iragarri du euskarazko "haur eskola herrikoia" abian jarriko duela, udal guneetan hizkuntza horretan plazarik lortzen ez duenarentzat. Kolektibo horretako eta euskalgintzako ordezkariek elkarretaratzea egin dute, Iruñeko Udaletxeko plazan, "hzkuntza eskubideen urraketatzat" jotzen dutena arbuiatzeko.
Ondoren, Euskalgintzako Asier Biurrunek eta Aitziber Monrealek, gurasoen kolektiboaren ordezkari gisa, agiri bat irakurri dute, eta bertan familiei dei egin diete aurrematrikulazio kanpainan euren seme-alabak euskaraz inskribatzeko, "nahiz eta jakin plaza kopurua benetan murritza dela eta plazarik gabe geratzeko arriskua dagoela". Ildo horretan, euskarazko haur eskolak lehen hiru aukeretan markatzearen alde egin dute, "nahia islatuta gera dadin".
Bestalde, aldi baterako eta "erabat koiunturala" izango den "herri haur eskola" bat martxan jarriko dutela iragarri dute. Haren iraupena datorren urtera mugatuko dute, Iruñeko Udalak datorren urtean egingo duen eskaintzan "plaza kopurua berreskuratzeko" helburuarekin. Hori dela eta, familiei eskatuko zaie plaza bat lortzeko, "sistema publikoan euskarazko plazak berreskuratzeko lanean aritzeko konpromisoa har dezaten".
Era berean, eskola hori "elkartasunean oinarritu beharko" dela nabarmendu dute, "bai finantzaketan eta baita aldarrikapenari eustean ere". Azaldu dutenez, "aldaketek kaltetutako" udal haur eskoletako hezitzaileekin harremanetan jarri dira, "herri haur eskola" horrek "eredu publikoarekin ahalik eta antzekotasun handiena" izan dezan.
Bestalde, Euskalgintzak adierazi du "Nafarroan euskararen aurkako erasoak bata bestearen atzetik" etorri direla, eta ziurtatu du "Iruñeko haur eskoletan eman nahi den atzerakada Iruñeko Udalaren ekintzagatik eta Nafarroako Gobernuaren omisioagatik" egingo dela.
Zentzu horretan, Udalak "euskara plaza kopurua 371 plazatik (eskaintzaren %39,4) 112 plazara (eskaintzaren %11,9) murriztuko du", esan du, hau da, "bularreko haurrentzat 20 plaza baino ez dira egongo". Nabarmendu duenez, gainera, "3 urtetik gorakoen matrikulazio datuek agerian uzten dute Iruñeko familien hautua (sare publikoan d eredua %35 da Iruñean)".
Horren harira, "neurrira" egindako inkesta bat egitea egotzi dio udalari; hala ere, "berriro ere agerian utzi du eskaria beraiek nahiko luketenaren gainetik dagoela: galdetutako familiek hizkuntza aukeren gorakada eskatzen dute, eta %36k interesa dute beren seme-alabek euskara ikas dezaten". Horren harira, kaltetutako gurasoek egindako proposamenak "ezetsi" izana gaitzetsi du.
Azkenik, Nafarroako Gobernuaren "omisioa" aurpegiratu dio, eta gogorarazi du foru gobernuak "bost haur eskola dituela Iruñean, eta euskaraz eskainitako plaza kopurua %14koa dela". "Zer ahalegin egingo du euskarazko plaza kopurua handitzeko?", galdetu du.
