HE Gurasoak lokal bila dabil seme-alabak euskaraz matrikulatu nahi dituzten familiei irtenbidea emateko

Taldearekin harremanetan jartzeko eskatu die HE Gurasoak-ek haur eskolan euskarazko plaza nahi duten familiei.

Navarra Sumak uko egin dio luzamendu bat ezartzeari haur-eskolen epaia betetzeko, eta horren ondorioz, nabarmen murriztuko da bularreko haurrentzako eta ibiltarientzako euskarazko plaza libreen kopurua, 136 plaza izatetik 61 izatera pasatuko da. Udaleko eta Parlamentuko talde politikoekin egindako bileretan ere ez dute konponbiderik bilatu berehala gertatuko den aurre-matrikulazio daten argitalpena baino lehen. Hala salatu du HE Gurasoak taldeak. Argitu dutenez, oraindik ere “irtenbide politikoetarako prest” daude, baina onartu dute talde parlamentario sozialistarekin bilera bat egiteko zain daudela: "Bilera hori aste askoan atzeratu da. Nafarroako Gobernuaren eskaintza ere urria da, eta PSN-k egoera hori arintzeko aukera du”.

“Gure gurasoen garaietan herri-eskolak izenez ezagutu zirenen antzeko zerbait egitera behartuta gaude”. HE Gurasoak plataformak adierazten duenez, “seme-alabak euskaraz matrikulatu nahiko zituzketen familiekin harremanetan jarri nahi genuke, alternatibak antolatzeko”. Beren esanetan, “Harremanetan daude aldaketarekin kaltetutako hezitzaileekin, higiezinen agentziekin udal-ordenantzak betetzen dituzten lokalak bilatzeko, eta eragile sozial eta sindikalekin”.

Azkenik, interesa duten familiei eskatzen zaie “harremanetan jartzeko, bai behar kuantitatiboak, bai behar geografikoak aztertzeko. Horrela, gobernuaren eta udalaren eskaintza urria, Herri Haur Eskolen irekierarekin konpentsatzeko. Era berean, interesatutako familiei landu ditugun ideia eta proposamenak ezagutarazi nahi diegu”. Plataformak, halaber, “aurre-matrikulazio estrategia komuna koordinatzea” du helburu.

HE Gurasoak plataformak ondoko posta elektroniko kontu hau eskaintzen die familiei: hegurasoak.harrera@gmail.com.