Zumetaren margoan Millan Astray ageri da, Espainiako Legioaren fundatzailea: betoker, besamotz, kopetilun, beldurgarri. Gainean, Unamunori esan ei zizkion hitzak ditu izkiriaturik, gaztelania batuan: “¡Abajo la inteligencia! ¡Viva la muerte!” (Pikutara intelgientzia! Gora heriotza!). Esan ei zituela diogu, ez dagoelako batere argi hitzok bereak diren. Nola iritsi zen, ordea, Zumetaren koadro handi hori Merced karrikara? Bada margolari handiaren eta intsumiso gazte baten arteko harremanari esker.
1993ko udazkenean Iruñeko espetxea intsumiso presoz bete zen. Hori euskaldunon hiriburuzagiko karriketan eragiten ari zen presioa ekidite aldera, Espainiako Gobernuak (orduan PSOEren esku) intsumisoei 3. gradua ematea erabaki zuen, gaua espetxean baina eguna kalean eman zezaten. Hainbat intsumiso iruindarrek, ordea, planto egitea erabaki zuten, 3. graduari muzin egitea.
Mikel Huarte Alzueta horietako bat zen. Egun, suhiltzailea da. Garaiotan, ikasle gazte bat zen, 23 urtekoa. Eta plantoa prestatzen ari zirelarik, aurrez-aurre ezagutzen ez zuen baina oso gogoko zuen margolari batekin harremanetan jartzea otu zitzaion: Jose Luis Zumetarekin hain zuzen ere. Haren margoak ikusita zituen zenbait disko azaletan, eta Hika aldizkarian. Aldizkarira deitu, eta haren kontaktua eskatu zuen. Hortik aurrerako istorioa ezagutzeko, entzun Huarteri Metropoli Forala saioan egin diogun elkarrizketa.