Iruñeko Emakumeen Etxea Agoitz kaleko Pablo Sarasate Musika Kontserbatorio Profesionala izandakoan kokatzea proposatu duIruñeko Udalak, aldi baterako. Iruñeko alkate Joseba Asironek eraikina egokitzeko gastua 2019ko ekitaldi ekonomikoan sartzea proposatu du.
Iraileko lehen hamabostaldirako bilera bat aurreikusi da Iruñeko Emakumeen Etxearen prozesuko eraikuntza kolektiboko taldearekin, eta horren ostean, proiektuaren eta kokapenaren inguruko behin-betiko agiri bat sortuko da, eta jarraipen-batzorde bat eratuko, teknikari, politikari eta eraikuntza kolektiboko taldeko kideek osatua.
Iruñeko Emakumeen Etxea proiektua Iruñeko III. Berdintasun Planean (2016-2022) jasotako jarduketa bat da, partaidetza eta eragin politikoari buruzko ildo estrategikoaren barruan kokatua, “emakumeen mugimendu antolatua Udalarekiko mintzakidetza-organoa izan dadin lortzea” izenburupean, eta zehazki “baldintza egokiak sortzea hiriko elkarte-mugimendua eta mugimendu feminista indartzeko” dioen atalaren barnean.
Lehendakaritza Batzordean eman du gaiaren berri alkateak, PSNren galdera bati erantzunez. Joseba Asiron Iruñeko alkateak alorraren ardura hartzearekin desados agertu da Aranzadiko Laura Berro. "Egungo gobernu taldean emakumeak izanda" ez du ulertzen arduraduna emakumeek jasan behar dituzten biolentziak ulertuko ez dituen"gizon zisgenero eta heterosexuala" izatea.
Estamos en contra de que Joseba Asirón asuma las competencias de Igualdad y LGTBi por varios motivos:
— Laura Berro (@LauraBerro_) 3 de septiembre de 2018
1. Se posicionó en contra de aumentar el presupuesto del área en la cantidad que era necesaria para 2018
(sigue)
PSNko Maite Esporrinek begi onez ikusi du ordenatza lantzea, baina, gaineratu du Asironek ez dituela beti emakumeak eta gizonak berdin tratatzen. UPNko Ana Elizaldek uste du alkateak ez diola "minutu erdi ere" eskainiko gaiari. Ezkerrako Edurne Eguinok, berriz, harrituta agertu da alkateak 2019ko aurrekontuan sartu nahi duelako.
Espazio fisiko eta sinbolikoa ahalduntze indibidual, kolektibo zein sarekoari begira
Proiektuak toki fisiko eta sinboliko bat jarri nahi du emakumeen eskura – hala norbanakoen nola elkarte eta kolektibo feministen eskura–, norberaren ahalduntzetik ahalduntze kolektibora eta sare-ahalduntzera igaro daitezen. Eta espazio hori elkarlanean sortuko dute horretarako prest dauden emakumeek.
Iruñeko Udalak prozesu partizipatibo bat abiatu zuen, 2018ko martxotik ekainera, Emakumeen Etxea diseinatu eta sortzeko. Hori amaitzean, agiri bat idatzi zen, helburuak, jarduketak, kudeaketa- eta finantzaketa-ereduak zehaztuta, eta horri oinarri hartuta lan egingo da honako gai hauei heltzeko: Iruñeko Emakumeen Etxearen behin betiko kokalekua, erreforma-proiektuaren idazketa, lanen-aurrekontua eta datorren urtean 2019ko aurrekontuaren kargura egingo liratekeen lanen gauzatzea. Abuztuan hainbat bilera egin dira Udalaren eta prozesuaren eraikuntza kolektiboko taldeko ordezkarien artean, Udalaren baliabide berri honen kokaleku fisikoa zehazte aldera.
Ekitaldi-aretoa eta beste hainbat gela dituen eraikin bat
Pablo Sarasate Musika Kontserbatorio Profesionala izandako eraikinaren beheko solairuan 200 besaulki eta 181 m2-ko ekitaldi-areto bat dago, 63 m2-ko agertokiarekin, bulego bat, eta bi biltegi txiki. Badaude, baita ere, musika-areto bat (47 m2), atezaindegia (22 m2), komunak eta bulego bat (12 m2). Txostenaren arabera, eraikinaren zati horrek ez du ia zaharberritze-lanik behar, legearekin bat egokitzekoak besterik ez, eta sartzeko arrapala bat, sarrera nagusian, 30.000 euroan baloratu dena.
Ikastetxe batek lehen erabiltzen zuen eraikinaren zatian 43 m2 inguruko 5 gela daude, komundunak, eta 155 m2-ko korridore zabal batek banatuak. Zati horrek irisgarritasun-arazoak ditu, eta lan horien aurrekontuak eta eraikina legearekin bat egokitzeko gainontzeko lanenak 70.000 euro jotzen dutela baloratu da.