Udaltzaingoko zuzendaritzak agindu argia eman die udaltzainei: Santo Domingo aldapan azokatik Hezkuntza Departamentuaren egoitzera arteko tartean kontrako norabidean doazen txirrindulari guztiei isuna jarri behar diete.
APM-SPPME sindikatuak sare sozialetan salatu duenez, zenbait udaltzain kexu azaldu dira erabakiarekin: izan ere, Espainiako Trafiko Zuzendaritza Nagusiaren arau baten arabera, bizitegi-kaleetan (kale erresidentzialetan), txirrindulariek badute kontrako norabidean joaterik.
Halaber, sindikatu horrek salatu du Udaltzaingoko zuzendaritzak udaltzainei ohartarazi diela agindua betetzen ez badute zigorra jarriko diela, bi ordu leku berean egotera behartuz.