Elixabete Garmendia
Gaurko izenburu nagusiak ez dakar argazkirik, soilik barruko orrialdeetan urpekariak Beriaingo Morea putzua miatzen.
Nik egunkaria miatu dut, argazkietan emakumeen bila. Eta topatu ditut izen propiodunak: Noala O´Luan, Brian Currinek zuzentzen duen taldekoa. Telebistako agendan, Maria Silvestre, Emakundeko zuzendaria. Euskarazko tesiengatik sariak jaso dituzten bost lagunen artean, bi emakume: Maite Oronoz eta Idurre Alonso. Euskalgintzan beste bat, Alizia Iribarren, Erriberan Euskaraz taldeko kidea.
Kulturako orrietan, Marianne Faithfull, Bilbon izango den kantari britainiar eder eta sakona. Hortik hurbil Maud Fontenay, nabigatzaile frantziarra.
Kiroletan Itxakoko neskak ageri dira, eta Korrikaren iragarkian emakumezko bat da buru, testigua daramala.
Adin, jatorri, lanbide eta interesgune askotariko emakumeak. Ausartak, inteligenteak, sortzaileak, konprometituak… plazandre nor bere arloan. Emakume izatearen harrotasuna pizten dutenak. Galeria argitsu horretan, ordea, soslai beltz bat, izen exotikoz: Yanela Zaruma. Aske izateko bide-zerga biziarekin ordaindu duen enegarren emakumea.
[audio http://euskalerriairratia.files.wordpress.com/2011/04/psh04791.mp3]