Josi Basterretxea
Udarako omen dira bizikletak, baina udaberrian ere topatzen ditugu horiek errepideetan. Gaurko argazkian horixe ikusi dut: txirrindulariak errepidean. Izan ere gaur, apirilak 4, hiru ordu barru, Euskal Herriko Txirrindulari Itzulia hasiko baita Zumarragan, Gipuzkoan. Sei egunetan ibiliko dira tropel koloretsuko atletak Hego Euskal Herriko errepideetan zehar: Araba, Bizkaia, Gipuzkoa eta Nafarroan zehar.
Akordura etorri zait ezen aste honetan ere beste itzuli bat hasiko dela gurean. Ostegunean, apirilak 7, Korrika hasiko da Trebiñun, batzuentzat Burgos eta beste batzuentzat Araba den enklabe kurioso batean.
Korrika zaleekin, kolorez beteko dira Euskal Herriko zazpi lurraldeetako errepideak: hegoaldekoak nahiz iparraldekoak.
Gaindituak izateko eginak dira mugak. Euskarak badaki hori. Korrikak badaki hori. Mugak hautsi behar ditu Nafarroako hizkuntza zaharrak, biziko bada baita etorkizunean ere.
Ez dira oraingoak larrosa-egunak euskararentzat. Are gutxiago Nafarroan. Egia da gaiztoagoak ere izan direla. Baina, hobeagoak espero ditugu.
Gurpil gainean nahiz oinetako barnean, bihotz-taupada bakoitzeko, hitz bat euskarari, euskarazko hitz bat.
Erredakzioaren oharra: apirilaren 4an emititua.
[audio http://euskalerriairratia.files.wordpress.com/2011/04/psh047831.mp3]