Aingeru Epaltza
Al Caponorena gertatuko zaio, beharbada, Berlusconiri. Europako gobernuburutza batean dagoen morroirik ustelena, zerk eta hankatarteak eraman dezake kartzelara. Lapurtu, ebatsi, iruzurtu duen guztiagatik ez, adin txikiko bati sexu truke ordaintzegatik jarraraziko dute epaitegian. Baina ez gaitezen behar baino lehenago poztu.
Hori guztia ikusteko dago. Atzo berean Italian egindako inkestek ondorio harrigarria zekarten: hauteskundeak orain eginez gero Berlusconik irabaziko lituzke berriz. A zer jendajea, italiarrak. Ezta? Hori ez litzateke hemen gertatuko. Ezta? Bada ni ez nago hain seguru. Bertze gauza batez, ordea, zalantzarik ez dut.
Bizi garen tokian, Berlusconiren karrera politikoari azkena eman diezaiokeen prozedura hasi ere ez litzateke eginen. Hemen ez dugu gobernuburu bat auziperatzeko potrorik ez gogorik duen epailerik.