Abeltzain eta nekazari den Gorka Izkorekin hitz egin du Euskalerria Irratiak. Labianokoa da bera, 28 urte ditu eta protestetan parte hartzen ari da. "Itota" dituztela salatzeko ari da parte hartzen mobilizazioetan. "Onartezina iruditzen zait astero bi egunez bulegoan egon behar izana burokrazioak agindutako paperak betetzen eta albo batean uztea benetan nire lana dena: larreak landu eta abereak zaindu", azaldu du Izkok.
Ultraeskuina euren protesten jabe egin nahi izanagatik galdetuta, uste du, egoera baliatu nahi izan dutela: "Nekazari eta abeltzainak horrexegatik atera dira kalera sindikatuen sigletatik eta politikarien alderdietatik aldenduta", esan du. Helmuga argi bat dutela ere iruditzen zaio: lehen egunean atera zituzten hamazazpi neurriak lortzea. Nekazaritza Politika Bateratuaren burokraziarekin amaitzea eta euren lanetik bizitzeko aukera izanen duten neurriak hartzea. Bidegabeak diren legeak egokitzea eta zentzuz ezartzea eskatzen ari dira.