Ibilgailu batek harrapatu eta ondorioz hil egin da lau urteko neska bat. Ezbeharra 19:20 aldera gertatu da. Antza, neska zebrabidea patinete batekin zeharkatzen ari zen harrapatua izan denean. Altsasuko beheko bentatik herrirantz sartzeko errepidearen, NA-8505, eta Sorgingainbehera kalearen arteko bidegurutzean dagoen zebrabidean izan da ezbeharra. Altsasuko tren geratokiaren ondoan.
Altsasuko osasun etxeko medikua eta erizaina ezbeharraren lekura hurbildu dira, baina ezin izan dute ezer egin. Ezbeharraren ikerketa Guardia Civilak hartu du. Jakinarazi duenez, gertakarian inplikatutako 23 urteko gidariak negatibo eman du alkohol proban.