Ez, albistea ez dator Irlandatik, hemengoa da. Azaleko argazki horretan, Bakartxo Tejeria, Eusko Legebiltzarreko presidentea, emakumezko batekin eta gizonezko batekin ageri da, solas gozoko itxuran, epelean, atzo Siberia xamar izan behar zuen Gasteizen. Tejeriarekin daudenak europarlamentariak dira.
Barruko orrietan, beste europarlamentari bat, emakumezkoa, Nafarroako Parlamentuan, Podemos-Ahal Duguko Laura Perezen diosala jasotzen, atzean Mayorga Ramirez txanda zain. PSNko diputaturik ez da ageri argazkian; izan ere, UPNrekin eta PPrekin batera, europarlamentariak hartzeari uko egin diote. Aldiz, Eusko Legebiltzarrean sozialistak egon ziren europarlamentariekin, jeltzaleak eta EH Bildukoak bezala.
Gakoa europarlamentarien mixioan dago, euskal presoen egoeraren berri jasotzera etorri baitira. Jirari jarraituz, Baionan izango dira gaur. Han litekeena da sozialistekin ere biltzea.
Sentsibilitatea dago hemen jokoan; sentsibilitate sozial eta politikoa. Dirudienez, PSNen soberan ez daukatena.
Argazkiaren gaineko izenburua indartsua, gogorra ere gertatzen da; hauxe dio: “Unionistekin ezin elkartu”.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
