Belaunaldien arteko arrakala nabarmena da kontu askotan. Horietako bat, zinea. Gaur zortzi, 1917 filma ikustera joan nintzen. Ederra pelikula, dena ona: istorioa, antzezleak, erritmoa, musika, argazkia. Aretoa erdi beterik zegoen. Ikusle guztiak, hori bai, Jesukristoren adinetik gorakoak.
Gazte jendea zinea pantaila txikian ikustera ohitu da, kosta egiten zaie zine-aretoetara joatea. Agian, gutxitan probatu dutelako. Pelikula batzuk –niretzat merezi duten guztiak- pantaila handian ikustekoak dira, zine aretoetako iluntasun giroan. Hori da, nire ustez, zineaz gozatzeko modu bakarra, nik gaur zortzi egin nuen bezala. Zineari dagokionez, belaunaldien arteko arrakalan, helduak garaile.