Inprobisatu eginen dut gaur
bertso ttipi hainbat.
Zuri begira.
Eroetxetik aterata,
argi betean babestua.
Atzoko sutea
eguzki bihurtu
Horma itxiek eraikitako
zoko beltz bakartua
erroetatik askatu.
Hurbilean mozorratu urruntasun hotza
bihotz berrien gar gozoetan leundu.
Eroetxetik at,
aske, ta lirain
biziari kanta eginen diot,
zuk xuxurlatu zenidan bezala.
Ibiltzeko gai den izararik gabeko mamu horri oihu eginez,
inprobisatutako bertso ttipi hauetan barna
bere arima zabalduz
bere gogoari deika:
uxa ditzagun definitzen gaituzten hitzak!
asma dezagun arnaserako erritmo berria!
Goazen, arinki, emeki,
ubide berrietako
lur lokaztu gardenetan
atxilotu gintuzteneko
azal zahar haiek inprobisatutako esku berriez ferekatzera!