Neoliberalismoa, besteak beste, lotura kolektiboen deuseztapenan datza, eskubide indibidualen defentsa sutsuaz jendartea hezurmamitzen duen joera edo harreman oro satanizatzen delarik. Ongi ezagutzen dugu emaitza: ez eskubide pertsonalik, ezta kolektiborik ere, sistema honetan jaun ta jabe dabilen bakarra dirua baita.
Eztabaida piztu du Nafarroan zaborrik ez bereizteko eskubidearen aldarrikapenak. Badirudi batzuendako edozein joera zibilizatzaile bultzatzea inposizioa dela. Agian, bide horretatik segituz, ezkerreko errailetik gidatzea edo egurra etxera eramateko Takonerako zuhaitzak botatzea eskubide gisa hartu beharko genituzke. Ez naiz iritzi horretakoa, alta. Beste zibilizazio bat eraikitzeko urrats ttikienek ere balio dutelakoan nago, batez ere elkartasuna eta elkarbizitza justua berekoikeriaren gainetik defendatzen direlarik.
